خطيب ريهام هشام مضيفة الطيران الراحلة يوجه رسالة مؤثرة لها في يوم زفافهما: وحشتيني.. فرحنا اتأجل والملايكة هتزفنا

نشر خطيب ريهام هشام مضيفة الطيران رسالة حزينة لحبيبته الراحلة في اليوم الذي كان من المقرر أن يتزوجا فيه، حيث كان الثنائي اتفقا على عقد قرانهما يوم 9 سبتمبر، ولكن فرقهما الموت، واسترد الله أمانته، بعد أن توفيت ريهام هشام محمود خليفة قبل زفافها بأيام، في شهر أغسطس الماضي.

خطيب ريهام هشام مضيفة الطيران الراحلة يوجه رسالة مؤثرة لها

نشر خطيب مضيفة الطيران ريهام هشام على صفحته بفيسبوك: النهارده كان اليوم اللي اخترناه بعد ما كنا حاجزين يوم 2/9 وقولتيلي نغيره ونخليه يوم 9/9 عشان يبقي يوم مميز.

ثم أضاف: كانت هتبقى أحلى طلة بالفستان الأبيض لأحلي عروسة ونشغل طلي بالأبيض وكبرت البنوتة كبرت ست الكل، الأغنيتين اللي ماكنتيش بتحبيهم حبيبتي، وتشغليلي كام أغنيه إنجلش وتبقي مبسوطة بيهم وأنا أصلا ببقى عارف العربي بالعافية.

أشار خطيب مضيفة الطيران الراحلة إلى أن اليوم كان سيجمعهما بيت واحد، واستعاد ذكرياته معها، قائلا: كنتي كل شويه تقوليلي فاضل كام يوم كنت أقول أي رقم وأفتح جوجل عشان أشوف بسرعة قبل ما تاخدي بالك، لكن دلوقتي خلاص مش هينفع أنسى فاضل كام يوم عشان النهارده هو اليوم اللي كنا مستنينه.

واستكمل حديثه متأثرا بقوله: ربنا أجل بنا الفرح شويه مفيش حاجة في إيدينا متقلقيش أنا مش متضايق وأكيد إنتي كمان مش متضايقة عشان إنتي في مكان أحسن بكتير، ومستنياني عشان نعمله في مكان أحلى والملايكة يزفونا.

واختتم رسالته المؤثرة قائلا: إنتي بس وحشتيني ووحشني إني أشوف فرحتك واليوم ده بيقرب بس لا راد لقضاء ربنا، حبيبتي هنعمل ايه، ثم استكمل منشوره بالدعاء لها بالرحمة والمغفرة وأن يسكنها الله فسيح جناته.