قبل محاكمته| أحمد فتوح في التحقيقات: كنا رايحين نتعشى وشفت جزء من الجثة جنبي| خاص
قال أحمد فتوح لاعب نادي الزمالك، في التحقيقات التي انفرد بها موقع القاهرة 24، بقضية التسبب في قتل المجني عليه أحمد السيد، بالخطأ، والقيادة تحت تأثير المخدر، أنه كان يقود سيارته الخاصة به متجها إلى قريه هاسيندا باي على الطريق الساحلي السريع، وخلال السير تفاجأ بشخص يعبر الطريق، وتوجه للحارة اليسرى ليتفاجأ به يستكمل عبور الطريق وحاول تفاديه لكنه اصطدم به من جانب السيارة الأيسر.
تحقيقات اللاعب أحمد فتوح
وأوضحت التحقيقات أنه خلال عبور المواطن الطريق الساحلي السريع من الناحية البحرية إلى الناحية القبلية وعلى أقصى يسار الطريق، تصادف مرور السيارة رقم ا ف ج بقيادة اللاعب بسرعه فائقة، أدت إلى الاصطدام بالمتوفى وتناثره إلى عدة أشلاء بعدة أماكن متفرقة، من بينها داخل السيارة التي ارتكب فيها الحادث والتي تم تجميعها بمعرفة رجال الإسعاف من مناطق مختلفة على الطريق، وتبين توقف السيارة على بعد 500 متر تقريبًا من موقع الاصطدام.
محاكمة اللاعب أحمد فتوح
وأقر أحمد فتوح لاعب نادي الزمالك بارتكاب الواقعة، لكن دون تعاطي الحشيش قائلا: اللي حصل إن أنا كنت في قرية ساحلية بقالي 3 أيام النهاردة الرابع، وامبارح الكابتن محمد صبحي وأحمد صاحبنا كانوا معايا، اتفقنا نروح نتعشى بالليل في أحد المطاعم في العلمين، وبعد ما اتعشينا ركبنا العربية بتاعتي والكابتن محمد صبحي كان قاعد قدام جنبي وأحمد اللي كان معانا قاعد ورا في النص.
واستطرت فتوح: وكنا راجعين على القرية، ومرة واحدة لقيت واحد بيعدي الطريق وبينادي عربية كانت معدية جنبي فخبطه.
وأردف: قبل ما أخبطه.. أحمد اللي قاعد ورا قاللي الحق الحق، وهو وده اللي خلاني أخد بالي من العربية اللي جنبي وهي بتعدي والراجل بيناديها وأنا بخبطه، أحمد اللي كان قاعد ورا كان بيصوّت وكابتن محمد صبحي نط من العربية، ولما وقفت لقيت في جزء من الجثة جوه العربية مش عارف دخل منين.
وأكمل أحمد فتوح لاعب نادي الزمالك: إحنا طلعنا من قرية هاسيندا باي ومشينا على الطريق الساحلي اتجاه مطروح ولفينا من أول کوبري ورجعنا تاني اتجاه الإسكندرية، وبعد كده لفينا تاني وروحنا مطاعم بالبو اللي جنب ريكسوس، أكلنا سوشي وسالمون وبعد كده اتحركنا من المطعم كنا راجعين هاسيندا باي تاني.
تفاصيل حادث الدهس
وعن سؤال كيفية وقوع الحادث خلال قيادته السيارة، أوضح أحمد فتوح لاعب نادي الزمالك أمام جهات التحقيق: اللي حصل أنا كنت ماشي في الحارة اللي في النص واللي خلاني أخد بالي أحمد حسن عشان مرة واحدة قالي حاسب فبصيت بسرعة لقيت واحد بيعدي وکان هيتخبط من عربية تاني وحاول إنه يفاديها فجري معايا في نفس الاتجاه وبعد كده خبط فيها، وبعد كده لقيت جزء من جسمه جوه العربية.
وأكمل أحمد فتوح لاعب نادي الزمالك أمام جهات التحقيق: محمد صبحي والعربية بتهدي نزل منها وأحمد حسن نزل قعد يصوت وأنا هديته والضباط جه في ساعتها مكملش 5 دقايق، ومكنتش قادر أحدد المسافة بالظبط ما بيني وبين المجني عليه وهي حوالى من 15 إلى 20 متر، وكنت شايفه بس هو كان مش بعید أوى ومش قریب.
واستطرد أحمد فتوح لاعب نادي الزمالك أمام جهات التحقيق: أنا أول ما أخدت بالي منه ضربت فرامل وكلاكس بس مش للآخر عشان إحنا ماشيين عربيات ورا بعض، وحاولت أفاديه وجيت على الشمال، وكنت مذهول من اللي بيحصل.
