أقوال المتهم بقتل شاب في المقابر: عضيته من إيده وشديت رقبته | تحقيقات
كشفت التحقيقات في واقعة مقتل شاب طعنًا على يد 3 لصوص في المقابر، بمنطقة العمرانية التابعة لمحافظة الجيزة، تفاصيل الواقعة.
أقوال المتهم بقتل شاب بالمقابر
وحصل القاهرة 24، على نص التحقيقات في القضية، وجاءت أقوال المتهم أمام جهات التحقيق كالتالي: أنا اسمي محمد.س، اللي حصل أني أنا شغال بلم خردة وكراتين من الشارع بالتروسيكل بتاعي، وكان معايا صاحبى فارس لأنه شغال معايا، واحنا بنلف في القومية قابلت واحد صاحبي اسمه جابر شغال في نفس المجال، وقالي ساعتها أنت بتعمل ايه قلتله أنا شغال، فقالي فيه مشوار هنقضية وهحاسبك عليه، فقلتله ماشي، وساعتها رن على أصحابه اللي هيروحوا معاه، واتفقوا أنهم يتقابلوا عند قهوة المحروسة، اللي في شارع المحافظة، وبالفعل رحنا المكان ده ومش لاقينا أصحابه.
وأضاف المتهم: بعدها أخدت نفسي وبدأت ألف أنا وفارس في الشوارع في القومية، وبعد شوية قابلت جابر تاني لوحده، فركب معايا في الصندوق، وإحنا ماشيين قابلنا اثنين من أصحابه اللي كان بيكلمهم، وأنا معرفش هما مين، وساعتها جابر قال لأصحابه دول أنا جيت أرن عليكوا التليفون فصل، واللي اسمه يوسف.ص، طلب من جابر سيجارة مخدرات، راح قاله تعالى معانا هجيب لك اللي أنت عايزه، وركب معانا هو ومهند جمال التروسيكل، ورحنا كلنا كفر الإشارة وهناك معرفناش نجيب الحاجة.
وتابع المتهم بقتل شاب في المقابر: وبعدها روحنا في مكان جبنا مواد مخدرة، ولقيت يوسف نزل وجاب المواد المخدرة وركب ورا، ومشينا فلقيت جابر قالي خدنا معاك لحد كوبري شرويدة، وأنا في الطريق وعند المقابر، جابر قالي اقف فوقفت ونزلوا أخدوا المواد المخدرة اللي جابوها، وقالولي مفيش سيجارة؟، وساعتها جابر طلع سيجارة مخدرات ولفها وشربناها كلنا ما عدا مهند، وكنت مشغل الأغاني ولقيت اللي اسمه يوسف فتح مطواة وكان بيرقص بيها، وكانوا كلهم واقفين على الأرض، وأنا كنت راکب التروسيكل بتاعي وكنت بعدل وشي عشان أمشي.
وأوضح المتهم: مرة واحدة سمعت صوت حد منهم بيقول أه، فببص لقیت فارس شد مع يوسف عشان كان سأله الساعة كام، وكان مفكره عايز يسرق التليفون بتاعه، ويوسف كان معاه مطواة، وكان في وسطهم جابر، وبعدها أنا نزلت عشان أشوف في إيه، لقيت اللي اسمه مهند ماسك إزازة، وجه يحدفها عليا وفادتها، ولقيته جه مسك فيا ومسكنا في بعض، وساعتها أنا عضيته من إيده، وشديته من رقبته وسمعت صوت واحد منهم بيقول آه يا بطني، وبعدها لقيت فارس بيقولي اجري يا راضي، ودا اسم شهرتي، وبالفعل ركبت التروسيكل بتاعي، وفارس جري ورايا، وركب في الصندوق وجابر جري وركب معايا هو كمان، وروحنا وبعدها لقيت الحكومة بتدور علينا ومسكونا أنا وفارس، وبعدها رحنا على المركز وبعدها جابونا على هنا ودا كل اللي حصل.
