القصة الكاملة لقضية اتهام عصام صاصا وشقيقه بالتزوير
تعقد محكمة مستأنف جنايات الجيزة، بعد قليل، نظر أولى جلسات استئناف عصام صاصا على حكم حبسه سنة بتهمة التزوير في محرر رسمي.
القصة الكاملة للمطرب عصام صاصا وشقيقه في قضية التزوير
وتعود البداية في الواقعة حينما ألقت الأجهزة الأمنية القبض على شقيق عصام صاصا بتهمة تزوير توكيل بالشهر العقاري لأحد المحامين، من أجل الدفاع عن مؤدي المهرجانات في قضية دهسه أحد الأشخاص أعلى الطريق الدائري وقيادته السيارة تحت تأثير مواد مخدرة.
وبمثول شقيق عصام صاصا أمام جهات التحقيق على خلفية اتهامه في قضية التزوير، جاءت أقواله: اللي حصل إن بعد ما عصام عمل حادثة طريق الدائري وتسبب في وفاة شخص أثناء عبوره الطريق، وكان عنده حفلة متحددة من زمان في 9 مايو 2024 هو سافر ساعتها عشان يحضر الحفلة دي وبعدها ساره. خ، كلمتني من رقم دولي من الإمارات وقالت لي في شخص هيكلمك وهتروح تقابله تأخذ منه ظرف هتاخده وتخليه معاك.
وأضاف المتهم في أقواله أمام جهات التحقيق: بعدها في رقم مصري كلمني قالي أنا محمود مع سارة هبعتلك لوكيشن عشان تیجي تقابلنا وابعتلي صورة بطاقة عصام صاصا فأنا بعتله صورة البطاقة وش وظهر وروحت على اللوكيشن اللي بعتهولي بسيارة أوبر، وقابلته وركب معايا في العربية وكان معاه ورق وقالي أمضي هنا بالاستلام وأبصم وأخدت منه الظرف ومشيت وما فتحتوش.
وتابع المتهم أمام جهات التحقيق: وبعدها بيوم تقريبا سارة كلمتني تاني وقالتلي ودي الظرف اللي معاك للمحامي فأنا روحت مكتب المحامي وقابلني واحد على السلم وقالي أنت أستاذ محمد فقولتله آه وأديته الظرف ومشيت.
وأكد المتهم في أقواله: وبعدها بكام يوم عصام كلمني وقالي هتروح تودي للمحامي الأتعاب بتاعته وقالي أستلف مبلغ من نسيبه وروحت مكتب المحامي عند السكرتارية، قالوللي استنى هنعد الفلوس وقعدت لما عدوا الفلوس وشوفت حد هناك كنت شوفته قبل كدا مع المطرب م. أ، وس. أ، فعرفت إنهم جوه والسكرتيرة عدت الفلوس وأنا مشيت ساعتها ومقابلتش حد وكنت عايز القابل المحامي بس معرفتش بعدها عصام قالي إنه هيعملى توكيل رسمي عام ومعاذ استلمها واديهالي وروحت الشهر العقار عشان هو طلب من ألغى التوكيل بتاع سامية المحامية فقالولي إن التوكيل دا لازم يتصدق الأول فروحت صدقتها من الخارجية، وروحت أودعت التوكيل اللي عملهولي عصام وبعدها روحت لغيت توكيل المحامية.
كما استمعت جهات التحقيقات لأقوال سيدة تدعى س. خ وتعمل منظمة حفلات، وجاءت أقوالها: عصام أنا بشتغل معاه حصري خارج مصر وعملت معاه أكثر من حفلة في مدينة دبي زيه زي باقي المطربين التانين زي الليثي والبحراوي وحمو بيكا ومصطفى حجاج وحماقي وغيرهم.
س: ما هي طبيعة عملك تحديدا؟
ج: أنا مقدمة برامج وبعمل في مكتب إعلامي بالإمارات، وعندي شركة سارة برودكشين.
س: وما هي مهام تلك الوظيفة تحديدًا؟
ج: بعمل مؤتمرات وبرامج إعلامية في مدينة دبي، أما بخصوص شركة سارة برودكشين فهي متخصصة في تنظيم الحفلات وباخد المطربين وبعملهم حفلات في الكويت والإمارات.
س: وأين تقيمين تحديدًا حاليًا؟
ج: أنا ليا محل إقامة في القاهرة وليا محل إقامة في دبي وبسافر ما بين هنا وهناك.
س: منذ متى وأنت تباشرين ذلك العمل تحديدا؟
ج: بالنسبة لشركة سارة برودكشين فهي من عام 2021 وكنت بعمل برنامج اسمه مهمة صعبة.
س: ما هي طبيعة علاقتك بكل من عصام. ط. ط، ومحمد. ط. ط، ومعاذ و. ع، السيد. م. ش؟
ج: هو عصام أنا بشتغل معاه حصري خارج مصر وعملت معاه أكثر من حفلة في مدينة دبي زيه زي باقي المطربين زي الليثي والبحراوي وحمو بيكا ومصطفى حجاج وحماقي وغيرهم، أما بالنسبة لمحمد. ط أنا ماليش علاقة بيه وعارفة أنه شغال مع عصام، أما بالنسبة لمعاذ. و، فهو مدير أعمال عصام وهو عارف المواعيد بتاع الحفلات اللي تخص عصام عشان كدة بتواصل معاه ومش معايا رقم محمد. ط، معايا رقم معاذ بس، أما السيد محمود فهو صديق وكنت على تواصل معه علشان بكلمه بخصوص المطربين والمطربين بيقعدوا عنده كلهم وهو صديق لهم.
س: منذ متى نشأت تلك العلاقة بسالفي الذكر؟
ج: عصام ومعاذ من سنتين تقريبًا، أما السيد أنا عرفته من خلال حادثة عصام لأنه كان بيحل المشكلة مع أهلية المتوفى في الحادث.
س: ما هي طبيعة علاقتك بكل من طلعت.أ. م. وإيهاب أبو الفتوح، ومحمود. ا. ع، وحسني. س. ا، ومحمود. ح، وأحمد. إ. ا؟
ج: أنا معرفش حد فيهم غير إيهاب أبو الفتوح.
س: ما كيفية معرفتك بسالف الذكر تحديدا؟
ج: أنا من سنتين تقريبًا قابلته في معرض عربيات في المهندسين وعرفني عليه وقالي إيهاب بيعمل توكيلات أو بيشتغل في الشهر العقاري مش فاكرة بالظبط وبيعملنا توكيلات للمعرض.
س: وهل تواصلتي مع سالف الذكر عقب ذلك؟
ج: أيوه هو أنا كلمته قبل كده بعد لما قابلته أو هو كلمني مش فاكرة وكان بيبعتلي على
الواتس آب جمعة مباركة وغيرها من المناسبات والأعياد.
س: وهل يوجد علاقة بينك وبين محمد. ح. م. ح؟
ج: أيوة أنا أعرفه من خلال الميديا وكان في واحدة صاحبتي كان عندها موضوع وروحتله مع صاحبتي من ثلاث سنوات، وروحتله ساعة حوار حادثة عصام صاصا مرة واحدة بس بناء على طلب عصام لما قالي روحيله علشان تشوفي هو هيعمل إيه في القضية بتاعتي، والكلام ده مش فاكرة امتى.
س: ما هي معلوماتك بشأن الواقعة محل التحقيق؟
ج: أنا كل اللي أعرفه أن أنا سمعت من السوشيال ميديا أن فيه مشكلة في التوكيل بتاع عصام صاصا وأنه فيه تزوير في الموضوع، وعرفت بعد كدة لما الناس جت اتسألت في النيابة وأن النيابة بتسأل عليا.
س: وهل كنت رفقة المتهم عصام. ط. ط. م. بتاريخ 6-5-2024 حال ارتكابه واقعة القتل الخطأ والتعاطي؟
ج: كل الوسط الفني راح لعصام صاصا قسم الشرطة ساعة الواقعة دي عشان نقف جنبه وعلشان هو غلبان ومالوش حد غيرنا.
س: وما هو قرار النيابة العامة الذي صدر بشأن واقعة عصام صاصا؟
ج: هي النيابة العامة أخلت سبيل عصام ساعتها.
س: وهل أبصرتي المتهم عصام. ط. ط بعد إخلاء سبيله من النيابة العامة؟
ج: أيوه أنا وهو ومراته وأخويا سافرنا كلنا على مدينة دبي عشان كان فيه حفلة.
س: ومتى تحديدًا غادرتم البلاد؟
ج: إحنا غادرنا البلاد بتاريخ 9-5-2024 الساعة 5 الصبح.
س: ومتى تحديدا عدتي للبلاد؟
ج: أنا قعدت ساعتها 10 أيام تقريبا ورجعت.
س: وهل عاد المتهم عصام. ط. ط. م آنذاك؟
ج: لا هو مرجعش معايا
س: وهل سالف الذكر على علم بقرار ضبطه وإحضاره؟
ج: معرفش هو عارف ولا لا.
وفي 22 يوليو الماضي أمرت جهات التحقيقات المختصة بإحالة مطرب المهرجانات عصام صاصا وشقيقه وآخرين إلى محكمة الجنايات، على خلفية اتهامهم بتزوير محرر رسمي خاص بقضية حادث عصام صاصا.
وقررت محكمة جنايات الجيزة، في جلسة 29 أغسطس الماضي، حبس مطرب المهرجانات عصام صاصا وشقيقه سنة، على خلفية اتهامهما بتزوير محرر رسمي، و10 سنوات لباقي المتهمين.
