جوزي بيموت بالبطيء.. زوجة إبراهيم شيكا لاعب نادي الزمالك السابق تستغيث لعلاج زوجها

استغاثت هبة الله التركي، لعلاج زوجها لاعب نادي الزمالك السابق إبراهيم شيكا، من مرض سرطان المستقيم، الذي يتكلف علاجه الآلاف.

تدهور حالة لاعب نادي الزمالك السابق

وقالت هبة التركي في تصريحات خاصة لـ القاهرة 24: إن زوجها إبراهيم كان يعاني من مشكلة بسيطة وخضع  لعملية، ولكن بعد ذلك تفاجأت بمضاعفات خطيرة مثل النزيف، حتى تم تشخيصه بمرض سرطان المستقيم، مما يتطلب رعاية طبية متخصصة، وتكاليف علاجية باهظة.

وأضافت: زوجي يوم عن يوم حالته بتسوء، عنده سرطان المستقيم في مراحله الأخيرة، ونفسيته بقت سيئة جدا وكل يوم بيبكي على حالته والدكتور قالي لازم يتحجز في مستشفى فيها غرفة لجراحة الآورام، ويحتاج لعلاج كيماوي تكلفته تتجاوز الـ 20 ألف شهريًا.

وتابعت: الدكتور قالي كويس إنه واقف على رجله لحد دلوقتي حالته صعبة جدا، ووصل بي الحال إني بقيت أنزل أشتريله مسكنات حتى لو الساعة 3 الفجر من كتر التعب والألم اللي بيشوفوه، وأنا طول الوقت بديله أمل إنه هيبقى كويس وهيخف وبحاول أطمنه، لأنه طول الوقت حاسس بوحده واكتئاب بسبب المرض والأدوية اللي بياخدها وتعب من اللف على الدكاترة، اللي بيقولولي لو استمر بدون علاج كده مش هيعيش لأن الورم انتشر في جسمه.

وناشدت بالحصول على تكاليف علاج زوجها من مرض سرطان المستقيم، بسبب تدهور حالته الصحية وحاجته للعلاج معقبة، مش عايزة حاجة غير إن جوزي يعيش، ويتعالج ويبقى كويس ويبقى أحسن لأن هو عنده طموح ونجاح طول حياته، وكل اللي محتاجه يتوفرله غرفة لجراحة الأورام في أي مستشفى وتكاليف علاجه.