أم تستغيث من إهمال حضانة أطفال بحلوان: ابني كان بيموت واتعلق من رقبته.. ومش هنسامح في حقه
استغاثت إحدى الأمهات عبر منصة فيسبوك للتواصل الاجتماعي بعد تعرض طفلها لواقعة إهمال بإحدى الحضانات في منطقة حدائق حلوان، وتسببها في تعلق الصغير وخنقه على لعبة الأرجوحة لمدة قد طالت لأكثر من 3 دقائق متواصلة حتى فقد وعيه، وذلك دون أن يلتفت له أحد من المُربيات أو مُعلمات الحضانة.
أم تستغيث من إهمال حضانة في حدائق حلوان
وشاركت سيدة تُدعى سلوى حلاوة منشورًا عبر منصة فيسبوك للتواصل الاجتماعي، تستغيث بسبب تعرض طفلها سليم الذي لا يتعدى عمره 3 أعوام، لواقعة إهمال داخل إحدى الحضانات بمنطقة حدائق حلوان، ما أدى إلى تعلق الطفل وخنقه على لعبة من الألعاب لمدة قد طالت لأكثر من 4 دقائق، ليكتشف طفل آخر وزميل له وجود سليم مُعلقًا على الأرجوحة من رقبته وفاقد الوعي.
وأردفت الأم سلوى من خلال مشاركته بفيديو، قائلة: في حضانة بمنطقة حدائق حلوان يوم الخميس 21 نوفمبر ابني اللي عنده سنتين ونص، اتعلق من رقبته في الزحليقة ومحدش اهتم بيه.
كان دايخ شوية.. ادعاءات كاذبة من صاحبة الحضانة
وتابعت بالتفاصيل: أبوه راح يجيبه من الحضانة صاحبة الحضانة ألفت موضوع وقالت لوالده، سليم تعب وودوه المستشفى بسبب إنه كان دايخ شوية من اللعب وخوفنا يكون جت له ضربة شمس.. بس الحمد لله الولد طلع كويس وباباه فضل يقولها ومكلمتنيش ليه تقوله محبتش أقلقكوا والموضوع عدى بخير.
واستكملت: بعد ما ركزت مع ابني لقيت رقبته عليها علامة حمراء والسويت شيرت كان مقطوع، والعلامة بارزة من قدام شكلها واضح أوي كلمتها سألتها ابني اتخبط أو وقع تقولي لا وأنا حسيت إن في حاجه غلط، واضطرينا إننا نروح الحضانة بنفسنا.
وأضافت: موقف مديرة الحضانة بعد ذهابهم لها قالت لنا ابنكم وهو بيتزحلق رباط السويت شيرت مسك في الزحليقة واتعلق من رقبته بس إحنا لحقناه وجرينا بيه على المستشفى والموضوع مكملش ثواني وده مش إهمال وفضلت تحلف إنها مأهملتش فيه وشافته على طول، وسألنا على الكاميرات قالت للأسف لا مش موجودة.
الأم: عملنا محضر إهمال ضد الحضانة
وأشارت الأم قائلة: زوجي عمل محضر إهمال ضد الحضانة، والحضانة طلع فيها كاميرات عادي وروحنا هناك وشفت ابني في الفيديو متعلق من رقبته لمدة أكثر من 3 دقائق، وفضل يعافر لحد ما غاب عن الوعي ولمدة دقيقتين أغمى عليه والمُدرسين رايحين جاين شايفينه ومحدش بص عليه.. لولا ستر ربنا أن طفلة صغيرة هي اللي تشوفه وتبلغ، محدش خد باله أن في طفل غاب عن عينهم لمدة 3 دقائق بالتقريب يعني الموضوع محصلش في ثواني زي ما هيا قالت.
واختتمت: ابني كان بيموت وكان بيعافر لحد ما خلاص مقدرش واستسلم، ابني بينام يعيط وبيحلم بكوابيس ومش عارف ينام، حسبي الله ونعم الوكيل في أي حد مسؤول عن اللي حصل لابني وإحنا مش هنسامح في حق ابننا ولا هنسكت غير لما كل الناس تعرف باللي حصل.
