كولر: لا أعلم موعد عودة وسام أبو علي.. ومباراة غدٍ لن تكون سهلة
قال مارسيل كولر المدير الفني لفريق الأهلي، إنه سعيد في بداية دوري المجموعات الفريق يدخلها وهو حامل اللقب للنسخة الماضية.
تصريحات كولر
وأضاف كولر في تصريحاته للمؤتمر الصحفي: هنلاعب بكرة خصم قوي عنده لاعيبه متميزين، أنا تابعت لهم كام ماتش هيحاولوا يسجلوا لكننا جاهزين بمساعدة جماهيرنا.
وأضاف كولر: وسام أبو علي للأسف مش موجود، وبتمنى رجوعه بسرعة، وبيساعدنا على الفوز بالمباريات، وبيبذل مجهود كبير، وصعب المقارنة بين وسام وأي لاعب تاني، كل لاعب عنده جودته، ونتمنى أن غياب وسام غدا ميأثرش علينا بكرة.
وأردف: إحنا في نادي عريق متعود على الفوز بالبطولات في كل العصور، وده بيحط أي حد فينا ضغط كبير وبيدورا على الكاس التاني، والجماهير بتحطنا تحت ضغط والفوز بالبطولات متعة كبيرة والخسارة خيبة أمل وهدفنا اسعاد الجماهير.
وواصل: أنا شوفت ماتشات لفريق ستاد أبيدجان، وعدم وجودهم في بطولة إفريقيا أوقات طويلة ميأثرش على أدائهم غدًا بالعكس ده حافز لهم، وكل الفرق بتيجي تلعب أكيد على الفوز أو على الأقل تاخد نقطة، وهدفنا الوصول للمرة السادسة لكأس العالم ولازم نزود من معدلات الجري بكرة ونكون مركزين بشكل كبير.
وأكمل: في الكرة دايما معرض أن لاعيبتك تتصاب أو يتوقفوا وأنت لازم تجهز البديل، وبقول للاعيبة لازم تطلع كل اللى عندك في التمرين، وأتمنى اللاعيبة اللى مبتشاركش متفقدش الأمل في المشاركة وتهتم بالتدريب بشكل كويس، وبقول لكل اللاعيبة كله هياخد فرصته، وهنلعب أكتر من 70 ماتش في الموسم وصعب عدد معين اللي يلعب في كل المباريات دي لكن كله هيشارك وهياخد فرصته.
وشدد: أنا من 30 سنة، مدير كرة في فريقي قالي إن هييجى يوم وهيكون فريق إفريقى هيكون بطل العالم وده حقيقي، شوفنا المغرب وصلت نصف نهائي كاس العالم لكن لسه فيه حاجات كتير ناقصة عند الأفارقة عشان ده يتحقق.
وأردف: أنا شايف إن قارة إفريقيا فيها إمكانيات كبيرة جدا لكن لسه فيه حاجات كتير تتعمل في إفريقيا خصوصا على مستوى الانضباط والالتزام.
واختتم: نرى لاعبين أفارقة كتير متألقين في أوروبا معرفش ليه مبيقدروش يساعدوا منتخباتهم بالشكل الكافي، زي ما بيعملوا في أوروبا، معنديش المعلومات الكافية عن فرق ومنتخبات إفريقيا عشان أعرف السبب.
