ضربوها في وسط الشارع.. تداول منشور لضرب شاب ووالده لفتاة بكورنيش الإسكندرية
نشرت فتاة تُدعى سارة سليم، منشورًا عبر موقع التواصل الاجتماعي فيسبوك، تعبر عن استيائها من قيام شاب ووالده بالتعدي على فتاة كانت تقود موتوسيكل بطريق كورنيش الإسكندرية بمنطقة سان ستيفانو محافظة الإسكندرية.
وكشفت الفتاة عن تفاصيل الواقعة قائلة: النهارده وسط الناس كلها اللي حصل إن في إشارة سان ستيفانو، أنا كنت قاعدة في الفود كورت اللي فوق وبصور فيديو للبحر، فجأة لاقيت بنت راكبة موتوسيكل، وحد زنق عليها فالموتوسيكل وقع، وأنا شفت من أول مشهد الموتوسيكل وهو واقع والرجل اللي جنب السواق في عربية ملاكي نزل وقعد يزعق لها جامد وفجأة لقيت واحد داخل عليها هجوم وضربها جامد وده هو اللي كان سايق.
ضربوها في وسط الشارع.. تداول منشور لـ فتاة تروي تفاصيل ضرب شاب ووالده لأخرى بكورنيش الإسكندرية
وأضافت الفتاة في منشورها: الولد وباباه مقصروش في ضرب البنت وضربها في صدرها وكأنها رجل.. أنا مصورة فيديو بالواقعة دي ياريت ترفعوا البوست علشان البنت دي تشوفه وابعت لها الفيديو وتاخد حقها.
وتابعت: بجد مهما حصل.. ومهما كانت لو هي غلطانة مين يقول إن شاب يضرب بنت كده وكأنها رجل.. وللأسف واحد أو اتنين بس اللي اتدخلوا في الموضوع وللأسف أكتر إن اللي نزلت دافعت عن البنت بنت زيها.
واختتمت الفتاة روايتها قائلة: إحنا بقينا في زمن إيه بالظبط؟
وطالبت بالبحث عن الفتاة حتى تتمكن من أخذ حقها إن أرادت، مؤكدة أنها لن تعطي الفيديو لأحد غيرها، ولن تقوم بنشره احتراما لعدم التشهير بها.. ربنا يرحمنا برحمته.
