كزبرة يرد على سخرية محمد رمضان: مش عارف أفرح بنجاحي.. عايز أبقى طيب وفي حالي
رد مطرب المهرجانات والممثل الصاعد أحمد بحر الشهير بـ كزبرة، على سخرية الفنان محمد رمضان من اسمه، وذلك بعد الخلاف الذي وقع بينهما قائلًا: إحنا مش في عطارة، معربًا عن استيائه بسبب هذه السخرية.
كزبرة يرد على سخرية محمد رمضان: مش عارف أفرح بنجاحي.. عايز أبقى طيب وفي حالي
وكتب كزبرة -عبر ستوري حسابه الشخصي بموقع إنستجرام -: والله يا جماعة الكلام ده نفسي أقوله من بدري بس حاسس أن وقته، أنا مش عارف ليه كل ما أنجح في ناس بتحاول تطلع صورتي وحشة، أنا بجد نفسيًا مبقتش قادر وبقالي فترة كبيرة كل لما أعمل حاجة حلوة مبقتش عارف اتبسط بيها ونفسيًا مش أحسن حاجة، وربنا اللي عالم الواحد كل اللي يهمه أنه يقدم حاجة تعجبكم وتسعدكم، بس في ناس بتتعامل مع اللي بيقدم حاجة كوميدية على أساس أنه شخص تافه مش موهوب، والواحد عشان بيتعامل بطبيعته ومش بيتصنع بتحاولوا تشوفوا إزاي تطلعوا في عيب قدام جمهوره وإخواته اللي بيحبوه.
وتابع كزبرة: زي ما بيتنسبلي كلام مقلتهوش أو يتقلل مني بحاجات قديمة عملتها وأحيانًا بتوصل للتريقة على اسمي بمجرد ما يعمل حاجة حلوة وتعجبهم، أنا مش عارف ليه وده السبب اللي بيخلي إنسان طيب أو ما ينجح يتحول لإنسان عنده نقص وعنده حرب مع كل اللي حوليه، زي ناس كتير نجحت وبقوا يتعاملوا بنرجسية عشان يعرفوا يتعاملوا مع الواقع.
وأضاف: أنا يا جماعة مش عايز أوصل للمرحلة دي، أنا عايز أبقى إنسان طيب وفي حالي واشتغل على نفسي وأقدم لكم فن يعجبكم ويبسطكم، هو ده هدفي فبلاش تتعاملوا مع الواحد بأسلوب هو مش حابه، وشكرًا لكل واحد بيدعمني من قلبه وأي حد بيحب اللي بقدمه أو حتى بينقده بأسلوب كويس، أنتم اللي تهموني وشكرًا.
واختتم كزبرة: في الآخر في قصص نجاح ملهة كتير تستاهل الناس تتكلم عنها ممكن تفيد الناس أكتر من قصة أحمد بحر كزبرة، وإزاي وصل لهنا، وهكون أسعد كتير لو كان التركيز على شغلي مش على شخصي، سواء بالإيجاب أو بالسلب علشان أتعلم وأطور نفسي في اللي جاي.
