أحمد العوضي: مبشوفش المنافسة.. باصص في ورقتي ومش شاغل نفسي بحد
أعرب الفنان أحمد العوضي، عن سعادته بتكريمه كونه أفضل ممثل في مهرجان الأفضل بدورته الـ10، مؤكدًا أنه لا يعمل للمنافسة بين زملائه بموسم رمضان، ولكن ما يهمه فقط النجاح وحب الجمهور.
وقال أحمد العوضي، في لقائه مع القاهرة 24: فضل من ربنا إني باخد تاني جائزة ليَّ من الجمهور السنة دي، وتاني تكريم ليَّ في مهرجان وشوشة للسنة التانية على التوالي، دي حاجة تبسطني وتسعدني، وأنا بشتغل دايمًا علشان الجمهور هو اللي يديني الجائزة.
وعن المنافسة في موسم رمضان، فعلق أحمد العوضي: أنا باصص في ورقتي ومبشوفش المنافسة وإحنا مش بنندب حد، في الآخر أنت بص في ورقتك وأنت ليك ناسك والنجم اللي جنبك ليه ناسه وليه الناس اللي بتحبه، وأنا هدفي أن الناس تحب اللي بقدمه ومبيشغلش بالي مين جنبي عامل إيه، أنا بتمنى النجاح لكل زملائي وبتمنى لنفسي أني أنجح والناس تحبني أكتر في الشغلانة اللي بقدمها.
وأردف أحمد العوضي: أنا بقول دايمًا إن رزقي في الدنيا حب الناس ليَّ، وربنا يديم عليَّ حب الناس وإني أبقى في حضنهم وده بالنسبة ليَّ أهم حاجة في الدنيا، وده اللي بيخليني أشتغل أكتر وأسعى أكتر.
أحمد العوضي رمضان 2025
وعلى جانب آخر، يستعد الفنان أحمد العوضي، إلى خوض السباق الرمضاني المقبل 2025 بمسلسل فهد البطل، ويشاركه في بطولة العمل كل من ميرنا نور الدين، أحمد عبد العزيز، لوسي، محمود البزاوي، صفاء الطوخي، صفوة، كارولين عزمي، عصام السقا، عزت زين، حمزة العيلي، محمد مهران، أحمد ماجد، محمود فارس والعمل تدور أحداثه في إطار اجتماعي شعبي.
