بهدف الحفاظ على البيئة.. فتاة تتنكر في شكل عمود إنارة بشوارع الإسكندرية تثير فضول المارة
تصدر فيديو، لفتاة ترتدي زيا تنكريا مبتكرًا في شكل عمود إنارة عتيق في الإسكندرية، تريند مواقع التواصل الاجتماعي خلال الساعات الماضية، حيث أثار حالة واسعة من الذهول عبر منصات السوشيال ميديا.
وقالت مارينا مجدي في تصريحات خاصة لـ القاهرة 24: فكرة ارتداء زي تنكري لـ عمود إنارة، هدفها التوعية بـ أهمية الحفاظ على نظافة الشوارع بـ الإسكندرية، وعدم إلقاء القمامة بجانب أعمدة النور في الشوارع أو الميادين المختلفة، حيث أصبحت الأعمدة بمختلف المناطق تتعرض لهذه الظاهرة.
فتاة تتنكر في شكل عمود إنارة بشوارع الإسكندرية
وأضافت مارينا: عندنا في شارع النبي دانيال بـ الإسكندرية، بيتعمل فيه تجديدات والمكان بقى نضيف جدًا، لكن اتفاجئت بالناس اللي بترمي فيه الزبالة بجوار أعمدة الإنارة، ومن هنا الفكرة جاتلي إني البس زي عمود النور وأمشي في الشارع، عشان أوضح للناس أهمية فكرة أننا نحافظ على الأعمدة دي ونحميها من أي تلوث أو قمامة ممكن تضر بيها وبالناس اللي عايشة في الشوارع دي.
واختتمت مارينا: ردود فعل الناس كانت بين السخرية والذهول، فيه كتير استغربوا لبسي، وناس خافوا من شكل عمود إنارة وفيه كانوا عايزين يعرفوا أنا ولد ولا بنت، كمان في ناس هزرت وضحكت عليا، وفكرة اللبس نفسها جاتلي من عرض مسرحي شوفته، والأفلام السينمائية الأمريكية ساعدتني ابني الفكرة بالشكل ده، وصحابي عجبتهم جدًا الفكرة ولفتت نظرهم، ومن أكتر التعليقات اللي اتقالت وأنا ماشية في الشارع، إزاى بتنوري كده؟! إزاي شايفة من العمود ده؟!
