ياسمين عز لـ السيدات: حطي ريد كاربت لـ جوزك.. آسر ياسين مش أحلى منه
وجهت الإعلامية ياسمين عز، كعادتها نصيحة للسيدات وذلك بمناسبة اقتراب حلول العام الجديد 2025، كاشفة عن قائمة المحظورات على الزوجة خلال تعاملها مع زوجها.
وقالت ياسمين عز، في برنامجها كلام الناس: فعّلي خاصية إن السنة دي بتاعتك ولو لف السند والهند ما يلاقي زيك ولا شبهك، ألبسي روبك الأحمر أبو ريش وحطي روجك النبيتي أو قلم روج سحري بقاله سبع سنين هيفي بالغرض بدل ما أنتي نايمة على الكنبة لابسة بيجامتين دفايا ولكلوك وحاطة لزقة ظهر نص متر وإربة على ظهرك.
وأضافت: قومي أعملي سحلب لـ جوزك في السنة الجديدة وكريب بالموز والنوتيلا ولو مفيش خدي حتة من جوزك مصدر النوتيلا والكاكاو الخام، وحطي له ريد كاربت في مدخل البيت آسر ياسين مش أحلى من جوزك يا مدام.
وعن قائمة المحظورات على الزوجة في تعاملها مع زوجها بالعام الجديد، فقالت ياسمين عز: بلاش تقولي له أنت فين، لغوها السنة دي، الجملة دي بترعبه حرام عليكي تبثي الرعب في قلب مؤمن، ومتقوليش له عايزة فلوس واللي يديهولك مشي نفسك بيه، أساليب الدلع اللي بيقدسها كل رجل أنك تسيبيه نايم، المفروض تكتمي نفسك وتتكلمي بلغة الإشارة عشان ميصحاش.
وتابعت: قومي أيتها المرأة الصهباء وأعملي أي منظر في السنة الجديدة، قومي أصبغي شعرك لـ الراجل أحمر زي مدام نبيلة عبيد هي مش أحسن منك، وأول ما يشوفك عاملة شعرك أحمر هيطلقك وعينيه هتزغلل.
وواصلت: بالنسبة للست اللي مش مرتبطة هتلبسي بيجامتك الدفاية وألبسي لكلوك ودفي ظهرك وبطنك علشان مفيش حد يدفيكي الحب مبيدفيش حد، اللي بيدفعي البطانية، متقعديش تفكري المرتبطين عاملين إيه، المتجوزين أكثر بؤسًا منك ومفيش حاجة فايتاكي.
