شقيق بشير الديك يكشف وصيته له قبل رحيله: قالي ابقوا كويسين مع بعض ومبيقاش فيه خلافات بينا
كشف شقيق السيناريست الكبير بشير الديك، تفاصيل وصيته له قبل رحيله، موضحًا أن الراحل أٌصيب بوعكة صحية بصورة مفاجئة، حيث إنه لم يكن يعاني من أي أمراض.
وقال شقيق بشير الديك، في بث مباشر عبر القاهرة 24: قالي إن ربنا ممكن يفتكره قريب وعايزنا نبقى كـ إخوة كويسين مع بعض ومبيقاش في خلافات بينا، ومنعملش قلق مع بعض، الحمد لله كان راجل كويس ومتواضع ومكنش بيقول إنه راجل مهم، وكان بييجي يقعد مع أصحابه وكنت بستغرب إزاي لسة فاكرهم وهو مشي من 50 سنة.
وتابع: بشير تعب مرة واحدة ودخل المستشفى من شهر، وكان عنده تعب في القلب والرئة وده حصله فجأة هو كان كويس، إحنا كنا عنده امبارح وكانت حالته فظيعة.
شقيق بشير الديك يكشف تفاصيل بدايته الفنية
أما عن بداية السيناريست الراحل، فعلق شقيقه: كان موظف في مديرية التربية والتعليم وسنة 1970 اتجوز وسافر القاهرة، وهو كان محب للقراءة وبيكتب قصص ويبعتها للمجلات، وبدأ حياته كـ سيناريست في القاهرة وأول فيلم كان مع سبق الإصرار، وهو دخلني معهد سينما قسم مونتاج لأني كنت بحب السينما، وكنت في ثانوي بدخل السينما كل أسبوع وهو قالي أقرأ عن السينما ودخلت المعهد ونجحت فيها سنة 1980، واشتغلت في فيلم البرىء.
