نفسيتي ادمرت ومش متقبلة شكلي.. فتاة تستغيث من صبغة شعر: جالي التهاب وعدوى
استغاثت فتاة تُدعى هدير علي، مقيمة في منطقة دار السلام، بـ محافظة القاهرة، بعد إصابتها بـ تورم في الوجه، والتهاب بـ فروة الرأس، وصداع شديد إثر استخدام صبغة شعر pella Tree اشترتها من صفحة لمستحضرات التجميل عبر الفيس بوك.
فتاة تستغيث من صبغة شعر: جالي التهاب وعدوى
وقالت هدير في تصريحات خاصة لـ القاهرة 24: اشتريت كريم صبغة شعر من 3 أيام، اسمه pella Tree، بعد ما شوفت بيدج على الفيس بوك اسمها your care، عاملين إعلان له، ومكتوب أنه من مواد طبيعية، وآمن للشعر، واشتريته على الأساس ده، وسعره 370 جنيهًا.
وأردفت: وبعد ما غسلت شعري واستخدمتها اتفاجئت بـ وجع جامد وحرقان في رأسي مش طبيعي، وغسلته علطول وفضلت حاسة بصداع مش بيروح، ولما نمت وصحيت لقيت وشي متورم، وفيه احمرار مش طبيعي، نفسيتي فعلًا اتدمرت ومش قادرة اتقبل شكل وشي خالص.
وأضافت هدير: تاني يوم صحيت روحت شغلي، صحابي قالولي وشك عامل كده ليه ولازم تروحي لدكتور، وقتها كنت حاسة بصداع جامد ومش قادرة افتح عيني من كتر الورم، وحتى مش عارفة اتعامل مع الناس.
واستكملت: أما روحت للدكتور، وقولتله على اسم الكريم اللي استخدمته، قالي ده غير مصرح به من هيئة الدواء ومش معروف خالص، وفيه مادة كاوية ضمن مكوناته خطيرة على المرضى اللي بيعانوا من حساسية الشعر، والكلام ده كله، للأسف متقاليش من البيدج وأنا بشتري الصبغة ولا حتى مكتوب على العلبة أي تحذير نهائي.
واختتمت هدير: قدمت شكوى في جهاز حماية المستهلك ومستنيه منهم الرد، ومش عايزه الموضوع ده يتكرر مع حد تاني، أنا عانيت وتعبت جدًا، وكشفت مرتين ده غير الوجع اللي حاسه بيه والصداع، وينصح أحد حد ميشتريش حاجة مش معروفه من الفيسبوك.
