عملوا السيشن في وسط البلد.. عروس المنوفية تفجر مفاجأة بعد تصدرها التريند: كنت منفصلة ومعايا أطفال
أثار فيديو زفاف عروسين وسط شوارع القاهرة، تفاعلا كبيرا وفرحة عبر منصات التواصل الاجتماعي، حيث ظهرت العروسة ممسكة بيد عريسها وبملابس الزفاف الرسمية، وبدون معازيم في مشهد غير مألوف، ووسط احتفالات المارة بهم، ليصبحوا حديث السوشيال ميديا خلال الساعات القليلة الماضية.
سيشن زفاف عروسين في شوارع وسط البلد
وقالت ياسمين يحيى، العروسة صاحبة فيديو السيشن في شوارع وسط البلد، في تصريحات خاصة لـ القاهرة 24: عملنا عمرة بدل الفرح، وكنا زي أي عريس وعروسة عايزين نفرح بزواجنا، ويكون لينا ذكرى بالفستان والبدلة، وقبل ما نروح وسط البلد كنت بفكر نروح جزيرة المعادي، لأني كنت بشوف فيها عرسان كتير بيعملوا السيشن هناك وسط الناس وبيكون شكلهم حلو.
وتابعت ياسمين يحيى: قلت لعريسي على الفكرة واخترت الفستان وروحت للميكب أرتيست في نفس اليوم، وعملنا السيشن بعد زواجنا بشهر، وبالفعل نفذنا الفكرة وسافرنا من المنوفية لـ القاهرة عشان نتصور السيسن دا، لإن احنا اتجوزنا بدون فرح وطلعنا العمرة، ولما رجعنا قررنا نعمل السيشن دا
واستكملت ياسمين يحيى، العروسة صاحبة السيشن في شوارع وسط البلد: مكنتش متوقعة رد فعل الناس بالشكل دا، وسعيدة بروح وطيبة الشعب المصري، سواء الناس اللي كانوا بيزفونا في الشارع وبيباركوا لينا، أو رجال الأمن اللي وافقوا إننا نصور السيشن في وسط البلد وعلى كوبري قصر النيل، وخاصة إن اليوم دا كان ليلة رأس السنة والشوارع زحمة وممنوع التصوير في المناطق دي.
وأضافت ياسمين يحيى: أنا منفصلة وعندي أولاد، وكل اللي حواليا كانوا رافضين إني أعمل فرح، لكن من حقي أفرح وألبس فستان أبيض تاني، وخصوصًا إن الشخص اللي معايا متمسك بيا بزيادة، وحجزنا وطلعنا عمرة 4 أيام، وبعد ما رجعنا مكنش معانا فلوس نعمل فرح، ولما ظروفنا المادية تحسنت عملنا السيشن والحمد لله فرحنا وسط الشعب المصري كله.
