هيثم نبيل: وقفت غناء بسبب وفاة أخويا وخدمة أبويا.. وربنا عوضني بـ 100 أغنية في الدراما العربية
كشف المطرب والملحن هيثم نبيل، سبب ابتعاده عن الغناء لمدة 4 سنوات، موضحًا أن وفاة شقيقه واعتنائه بوالده السبب الرئيسي في ابتعاده عن الساحة الفنية.
وقال هيثم نبيل، في لقائه مع الإعلامية ياسمين عز، في برنامجها كلام الناس، المذاع عبر شاشة قناة MBC مصر: وقفت غناء لمدة 4 سنين لظروف عائلية بعد وفاة أخويا، وكان الأنسب أني اشتغل من البيت، وكنت كل ما أنزل لـ حفلة أو شغل برا كنت برجع على كارثة، وسبحان الله في الفترة دي بدأت أعمل أغاني للمسلسلات وده كان بالصدفة.
وأضاف هيثم نبيل: أنا طول الوقت مكنتش عايز والدي يحس أن تعبه عطلني وكنت عايزه يشوفني ناجح في حاجة بحبها والحمد لله كل حاجة كانت بتنزل كانت بتكسر الدنيا من أول الموسيقى التصويرية وأغاني مسلسلات ولد الغلابة والبرنس وجعفر العمدة ونعمة الأفوكاتو، والموسيقى التصويرية جزء لا يتجزأ من العمل وأنا كنت سعيد جدًا بمسلسل نعمة الأفوكاتو.
وأكمل هيثم نبيل: أبويا كان دايمًا شايفني من وأنا صغير نحلة، وأول حد قدمني حميد الشاعري وطارق العريان بيعملي كليباتي، ولكن أهلي رقم واحد في حياتي، طبعًا الصح أن الواحد يوفق ولكن الموضوع جالي بعد وفاة أخويا على طول، فحصلي زي فوبيا البعد عن البيت خاصة أن أبويا تعب جدًا وكان عايش معايا، وربنا كان كريم وعوضني في التلحين.
هيثم نبيل: عندي أكتر من 100 أغنية في الدراما العربية
وواصل هيثم نبيل: المخرج محمد سامي كان بيتفاجأ أني اشتغلت وبعت حاجة من المستشفى، وأنا دايمًا كنت بفصل بين الصحوبية والشغل والبيت، وكنت متأكد أن ربنا هيعوضني، وأنا كنت في عز ما بخدم والدي في البيت كنت بشوف ناس أنا بدأت قبلهم سبقوني ولكن ممشيتش وراء وسوسة الشيطان، وأنا في خلال 5 سنين بقى عندي أكتر من 100 أغنية في الدراما العربية وربنا خلاني في الصفوف الأولى بتاعة الأعمال الدرامية، وده كان تعويض وكرم كبير من ربنا، والحمد لله رجعت مع شركة روتانا وخدت أفضل مطرب شاب 2024.
