أبرز تصريحات محمود سعد التليفزيونية| عمرو أديب تدرب معي وهو نمبر وان الإعلاميين.. وهذا سبب توقفي عن التوك شو
كشف الإعلامي محمود سعد رأيه في المنافسة على لقب نمبر وان بين المذيعين والمذيعات، مؤكدًا أنه يفضل الابتعاد عن هذه المنافسة، وأن السعي وراء اللقب ليس هدفا حقيقيا.
وقال محمود سعد في تصريحات تليفزيونية: فيه مذيعين كتير ومنهم نجوم كبار، وأنا مش منهم الحمد لله، وسحبت نفسي من المنطقة دي. مش قصدي إني خارج المنافسة، لكن المنطقة دي معظمهم بيشتغل فيها هي التوك شو. السعي لأن الإنسان يكون الأول دا محبط ومش كويس، ولازم الإنسان يسعى إنه يكون هو، ويقدم حاجة هو مقتنع بيها وصادقة. هو دا السعي الحقيقي.
وأضاف محمود سعد: كنت من أشهر المذيعين في يوم من الأيام، ودلوقتي مبقتش آخد بالي من الحاجات دي لأنها وقتية. مش مهم أكون متربع على العرش، لأن في الآخر هييجي واحد تاني يتربع، ودا شيء طبيعي.
محمود سعد يشيد بعمرو أديب وتامر أمين
أشاد محمود سعد بزملائه في الوسط الإعلامي، وعلى رأسهم الإعلامي عمرو أديب، حيث قال: عمرو أديب مذيع مشهور وكبير، ومحقق نجاحات كبيرة، وأنا أحبه. كنا أصدقاء من زمان، وأعتقد إن عمرو مش شاغل نفسه بفكرة الأول أو الثاني، ولكن فيه طبعًا مذيعين مشهورين جدًا وبيحققوا حاجات كتير جدًا، وأنا كنت في يوم من الأيام من أشهر المذيعين، ودلوقتي مبقتش أخد بالي من الحاجات دي، لأنها حاجات كلها وقتية، وعمرو أديب مذيع مشهور وكبير ومحقق نجاحات كبيرة، وأنا أحبه، وهو نمبر وان، وعمرو وهو شاب جه يتدرب في صباح الخير معانا.
كما أثنى سعد على تامر أمين قائلا: تامر مذيع شاطر جدا، عنده كل الأدوات وأكتر مني بكتير. ممكن يقعد 3 ساعات ميتحركش خالص يتكلم بطلاقة ويعمل كل حاجة.
ونفى سعد وجود أي خلافات مع تامر أمين، موضحا: ليس حقيقيا وجود خلاف بيني وبين تامر، وبقول رأيي دا في كل مكان.
وعن توقفه عن تقديم برامج التوك شو منذ عام 2015، قال سعد: سواء كنت مجبرا أو مختارا، ليست القضية. لكن توقفت وسنتين قعدت في البيت مبسوط جدا. ولو رجعت بيا السنين كنت أخدت نفس القرار.
