مستر إكس والتراجع عن التصريحات.. ننشر التحقيقات في أزمة أحمد قندوسي مع أمير توفيق |انفراد
كشفت التحقيقات، عن تفاصيل أزمة أحمد قندوسي، لاعب نادي سيراميكا كليوباترا، وأمير توفيق، مدير التعاقدات السابق في النادي الأهلي والمدير التنفيذي الحالي لشركة الكرة بالنادي، بسبب تصريحات قندوسي حول التعاقدات.
قضية قندوسي وأمير توفيق
وحصل القاهرة 24 على نص التحقيقات في القضية رقم 7677 لسنة 2024 إداري أول أكتوبر، وجاءت أقوال أمير توفيق كالتالي: بداية الموضوع ظهر اللاعب أحمد قندوسي بتاريخ 4 أكتوبر 2024 على قناة أون تايم سبورت، والمذيع سأله عن اللاعب زين الدين بالعيد، ليه مجاش الأهلي؟، رد عليه وقاله ازاي أنا أقوله ميجيش الأهلي زي ما الشائعات قالت، فالمذيع قاله: هو كلمك؟.
وأضاف أمير توفيق: قندوسي رد أنا كنت مع اللاعب في معسكر منتخب الجزائر، وهو مجاش عشان خاطر الوكلاء، فالمذيع سأله تاني ليه مجاش؟ فقندوسي رد عليه ما هو بسبب الوكلاء لأنه هو عنده وكيله مينفعش يتخلى عنه، فالمذيع رد عليه قاله أنا مش فاهم حاجة، قندوسي رد: احنا كجزائريين مينفعش نخسر الوكيل، عشان ده جايبلي التسويق إنت وكيلي من أول لحظة يبقي هتكمل معايا لآخر لحظة.
وأكمل توفيق أمام جهات التحقيق: المذيع قاله صفقة زين الدين بالعيد متمتش بسبب وكلاء فاللاعب أحمد قندوسي رد عليه قاله باظت بسبب الوكلاء، والمذيع سأله ازاي؟ رد عليه وقاله: كل الكلام اللي بيطلع في الميديا كدب.
وتابع: المذيع رد عليه انت قولنا إيه الصح؟ قندوسي قال: الصفقة باظت عشان الوكلاء، وزين الدين بالعيد بنسبة 70% كان في الأهلي، فالمذيع سأله على عدم انتقاله للأهلي فرد عليه وقاله بطريقة ساخرة: الله أعلم بس الناس عشان تدخل النادي الأهلي، لازم تدخل مع فلان ولازم يقابل مستر إكس، فالمذيع رد عليه قاله بس الكلام ده خطير يا أحمد.
واستطرد: قندوسي في حديثه مع المذيع قال إن وكيل اللاعب زين الدين بلعيد مش هيدخل معاه النادي الأهلي، وهيدخل مع وكلاء تانيين، واحنا الجزائريين ميقدرش حد يجبرنا على حاجة.
