خالد دياب يسخر من نادي “نيو جيزة”: “لو عاوز تخلص من مراتك وابنك روح هناك”
سخر خالد دياب، مخرج فيلم “طلق صناعي” من نادي “نيو جيزة”، بسبب سوء الخدمات وقلة الأنشطة الرياضية.
وقال دياب في منشور له عبر صفحته الرسمية على موقع التواصل الاجتماعي “فيس بوك”: “نادي نيوجيزة Vs مركز شباب شبرا الخيمة ……لو عايز تروح بيتك مرتاح الضمير وتخس و تحصل على سيلف ديفنس بسعر كويس و تخلص من مراتك وبالمرة تخلص من عيل رخم مضايقك اشترك في نادي نيو جيزة… ليه؟”.
قلة الأنشطة الرياضية من أبرز السلبيات
وأوضح المخرج خالد دياب أسباب هجومه على المسئولين بنادي نيو جيزة بسبب سوء الخدمة وقلة الأنشطة بعرض سلبيات النادي على أنها مميزات قائلًا: “أولا راحة الضمير في نيو جيزة هاتقولهم عايز تلعب تنس … هايقولولك لا والله مفيش مدرب. طب في حد ألعب معاه سكواش؟ للأسف معندناش مدربين سكواش طب في مدرب بنج بونج؟ برضه لأ طب في حد ألعب معاه السبع طوبات؟ لا مفيش مدرب سبع طوبات للأسف، طب بلي!، برضه لأ … في النهاية أنت بتروح مبسوط لأنك بتحس إنك عملت اللي عليك وحاولت في تسعة وأربعين لعبة والعيب مش عندك زي بالضبط إحساسك بالرضا لما بتشترك في جيم حتى لو مروحتش ولا مرة”.
“الهوت دوج بيخسس!”
وأضاف خالد دياب: “هاتخس لإنهم بيقدمو هوت دوج نوعه قبنوري تقريبا مش متأكد.
الهوت دوج ده بيتقدم في عيش ناشف سنه كده بيعملوه بالأسمنت الأبيض تقريبا بدل الدقيق، العيش ميزته إنه بيعلمك الاحترام لإنك لو هزرت وأنت بتحاول تاكله ممكن تعور حد، سمعت بس مش متأكد إن في حد خد اتناشر غرزة في وشه كان بيهزر مع واحد بياكل هوت دوج هناك.
نصحتهم ينزلو مع الهوت دوج صفيحة منشار أو إزميل بدل الشوكة والسكينة و أعتقد بيفكرو في المقترح بجدية لكن لسه مفيش رد.
العيش ده سمّع جامد وبقى بيتطلب بدل السيلف ديفنس، لو سمحت عايز واحد هوت دوج عشان طالع عالصحراوي متأخر وأخاف هجامين يثبتونا عالطريق”.
خالد دياب يسخر من سوء خدمات نادي نيو جيزة “تخلص من مراتك في البسين”
وواصل :”ولو حابب تخلص من مراتك بدون أي دليل ضدك إقنعها تنزل البسين …ليه؟ ميه البسين وصفها أكبر دكتور أنف وأذن إنها إما بركة أو ترعة ده لما واحد صاحبي جاله فيرس في ودنه مش بيعيش غير في المجاري من عومه هناك وفقد سمعه شهرين واضطر يعمل 3 عمليات عشان يرجع يسمع طشاش بس ده مش المهم، المهم إننا اكتشفنا طريقة تمكن الزوج من التخلص من مراته بطريقه سهلة وآمنة بدون دليل جنائي ضده إنه يزوقها في البسين قال يعني بيهزر معاها فتتطرش أكيد ولو ربنا كرم والفيرس كمان مسك في عنيها واتعمت يبقى خير و بركة”.
واختتم مخرج طلق صناعي : “أخيرا لو في طفل رخم مضايقك خده معاك النادي و مش محتاج تزقه في البسين زي مراتك لأ هو هايقع لوحده في بلاعة.. آه و رحمة جوز خالتي حصلت. طفل وقع في بلاعة جوه النادي و اختفى لولا أخته كانت معاه صوتت فجه واحد من الأهالي مش من النادي … طبعا موظفين النادي مشغولين بحاجات أهم.. بيعملو عيش الهوت دوج التحفة و بيوسخو البسين … المهم الأهالي شبكو أيدهم في بعض وواحد نزل أنقذ الطفل الحمد لله.
ملحوظة: ما ذكرتش إنك هاينفع تخلص من مراتك في بلاعة هناك لأن هناك في نظام… البلاعات صغيرة ما بتسعش غير أطفال بس فنلتزم بالخطة … المدام في البسين و الأطفال في البلاعات وادعي ل”نيو جيزة”… ملحوظة للأمانة النادي مبانيه حلوة”.
