حازم سمير: “بدأت شغل من إعدادي.. والمهرجانات اتمنعت عشان بقت تجيب فلوس”(حوار)
هو ممثل في الـ43 من العمر، محب للأعمال اليدوية، الفنان حازم سمير، الذي كان المجال الفني بمثابة حلم بعيد له حارب كي يصل إليه، وبدأ من مسرح الجامعة ثم مذيعا ثم مونتير حتى عرفت قدماه طريق الساحة الفنية، صاحب الـ36 عملا فنيا منها فقط خمسة أفلام، اشتهر بأدواره الاجتماعية التي جسد فيها شخصيات مختلفة بطريقته التي تترك أثرًا راسخا لدى الجمهور.
“القاهرة 24” التقي النجم حازم سمير، الذي فتح قلبه للحديث عن كواليس حياته الفنية، وكشف عن أعماله الفنية القادمة
بدأت دخول سوق العمل منذ الاعدادية، ما هي الوظيفة التي بدأت بها؟
“اه اشتغلت من إعدادي في مجال الـ “sales”، وقدرت أكسب خبرة كبيرة جدًا من التعامل مع البشر، وشجعني صحابي، حيث سافروا إلى أمريكا وهناك يُطلب منهم يشتغلوا في الأجازة عشان يوصلوا رسالة التساوي الاجتماعي، بمعنى إن اللي بيشتغل في البنزينة عادي بيبقى أخوك أو حد من قرايبك، أنت مش أحسن من حد ولا حد أحسن منك، وأنا استمتعت جدا بتجربة الشغل من سن صغيرة، وعندي مبدأ والدي قالو وهو: يا تشتغل اللي بتحبه يا تحب اللي بتشتغله، وأنا دلوقت بشتغل اللي بحبه وزمان كنت بحب اللي بشتغله”.
هل تسمح لأولادك أن يبدءوا العمل من نفس عمرك؟
“أكيد آه، خصوصًا لو هم حابين الشيء دا أو التجربة دي”.
حدثنا عن بدايتك في المجال الفني؟
“أنا بدأت من زمان في مجال التمثيل، وكنت بمثل في مسرح الجامعة، وبدأت بالمونتاج واشتغلت فيه أكثر من 13 سنة، ودا أداني فرصة اني أعرف حاجات جديدة، والحمد لله ربنا وفقني إني اخترت مجال صح في الميديا كان سببا في اكتسابي الكثير من الخبرات العملية، وبعد كدا اشتغلت مذيعا في قناة النيل للدراما وقدرت أعرف ناس أكثر ومخرجين وممثلين، وقدرت أشتغل في التمثيل بعد كدا بفضل الله”.
حازم سمير: “مبهتمش بكلام الناس.. ومش عايز أبقى نجم صف أول”
ألا تجد أن دراستك في السياحة والفنادق تختلف عن مجال عملك، أم كان دخولك التمثيل صدفة؟
“أنا اخترت الكلية بنفسي ومثلت في المسرح، والتمثيل أكيد مش صدفة، ولكن زي ما بيقولوا العقل في التفكير والرب في التدبير، أنا كنت شغال في المونتاج وطبعًا كنت ليا أهداف كثيرة شايفها أحلام أو صعبة التحقيق، والتمثيل كان منها ولكن كمان كان فيه رفض من البيت بسبب العادات القديمة إن الأهل بيفكروا للابن أنت هاتبقا ايه، ولكن الحمد لله ربنا وفقني واشتغلت في الحاجة الي بحبها”.
5 أفلام من أصل 36 عمل فني، ما السبب وراء هذا الفارق الشارع بينهما؟
“لأن ممكن المخرجين شايفين إني مانفعش في السينما، وأنفع في الدراما أكثر وأنا عاجبني الدراما ومبسوط بتقديم الأدوار الاجتماعية، لأني بحب النوع دا من الأدوار الي بتعبر عن الناس لأن إحنا عايشين في مجتمع وفيه ناس وعايشين مع ناس كثيرة مش في صراع ولا قتل ولا خناق طول الوقت عشان كدا أنا بحب الاجتماعي أكثر، مثلت في أدوار تانيه، ولكن أنا بحب الاجتماعي أكثر”.
ما هو الدور الذي شعرت أنه حقق لك الشهرة والبصمة الثابتة في وجدان الجماهير؟
“شخصية أدهم في هبة رجل الغراب، فكانت من أبرز ما نجحت فيه جدًا بفضل الله، وماكملتش في الأجزاء الي بعدها لأسباب فنية أكثر لأن باقي الكاست اتغير، وأنا مش بفرح بالناس الي بتقولي الجزء بتاعك أحلى، لأن هم كمان بذلوا مجهود يُحترم، وأنا شخص مابحبش أغير من حد أو مابحبش فكرة الحقد على حد، ما الي ينجح ينجح أنا ماليش دعوة”.
من هو الممثل الذي ترغب في العمل إلى جانبه، وهل تفكر في الاعتزال؟
“أتمنى العمل بجانب الكثير من الممثلين، وهذا قبل أن اعتزل التمثيل، أنا بفكر في الاعتزال ولكن مش في وقت معين، أنا شخص بحترم سني وشغلي جدًا، وهيجي وقت هاقرر إن خلاص مش هاكمل، احترامًا لبدني، وأنا عارف أن فيه أدوار معينة هاتنفع في السن دا، ولكن أنا بشوف إن لاء لازم يكون لكل شئ بداية ونهاية، وأنا ممكن أصحى بكرا أقرر إني مامثلش تاني، كل شئ ممكن”.
“بكره السوشال ميديا.. وقريب هظهر في مسلسل على منصة إلكترونية”
ما تعليقك على قرار نقيب الموسيقين هاني شاكر في منع المهرجانات؟
“أنا المشكلة دي لا تعنيني في شئ، وماتخصنيش، أنا زوقي في أغاني معينة أحب أسمعها وأسمعها لولادي، ولكن المهرجانات الي مش عايز يسمع ها مايسمعهاش كل واحد وزوقه، وبعدين الأغاني دي موجودة من زمان، اشمعنا دلوقتي يعني، وأنا شايف إن المهراجانت دي بقيت تتهاجم دلوقت لأن مطربي المهراجانت بقوا يعملوا فلوس كتير ودا بسبب الحقد والغل بينا الي بين الناس، أو عشان بتجيب مشاهدات على يوتيوب عشان بقا معاهم فلوش أكثر، انا بربي ولادي على نوع معين من الموسيقى لو هو قرروا هم يسمعوا نوع تاني خلاص براحتهم، ما إحنا كمان كنا بنعمل عكس الي أهالينا عايزاه وتقولنا عليه، وفي وجهة نظري أنا شايف إن الي غلط يتعلم، ونفهمه مش نمنع نوع كامل من الغناء له جمهوره برضو أكيد، أنا ماليسش دعوة بقرار استاذ هاني شاكر، ولكن دا رأي”.
هل يشكل كلمات الجمهور السلبية عائقًا لك؟
“أنا ماليش دعوة بكلام حد، والناس تقول الي هم عايزينه، بيقولوا مش هابقا صف أول لو ماعتمدتش على الأساليب التي يعتمد عليها الممثلين كفكرة استخدام مواقع التواصل الاجتماعي بشكل مفرط، ماشي تمام أنا مش عايز ابقا نجم صف أول بس أبقا بعمل الي أنا عايزه ودي حياتي محدش له دعوة بيها، أنا المهم أكون مبسوط كدا”.
هل علمت بما تعاني منه منى فاروق، فما تعليقك؟
“منى فاروق هي بني أدمة ومين فينا مش بيغلط، وإحنا مين عشان نحكم على البشر امته ادينا لنفسنا صفة الألوهيه “استغفر الله”، عشان نحكم على بني أدمة، هي غلطت وكلنا بنغلط وربنا يسامحها، ربنا بيغفر كل الأخطاء، ليه فيه أخطاء البشر مش بيغفروها، أنا شايف إنها غلطت وخدت جزاتها النفسي، وإحنا مالناش دعوة وهي بني أدمة خسرت كل حاجة دلوقت خلاص، احنا ليه نحاسبها، ما خلاص ربنا يتولها ويقويها”.
كيف هي علاقتك مع السوشيال ميديا؟
“السوشال ميديا سلاح ذو حدين، وبتروج شائعات أحيانًا تكون خاطئة وأنا مابحبش الميديا، على الرغم من إني عندي حسابات عليها، ولكن مش أنا مش شخص أحرص على التفاعل عبر مواقع السوشال ميديا، وأرى أن هي السبب في مشكلات كثيرة موجودة حاليًا، ف أنا بشوفها حاجة سيئة جدا وبتروج لحاجات بتسبب صراعات بين البشر، وطبعا الدور السلبي للمديا دا في كل العالم، وأي حد يقدر يقول أي حاجة ويخلي الناس تشوف الي هو قاله دا، عشان كدا أنا مش من مشجعي السوشال ميديا”.
ما رأيك في عرض المسلسلات عبر المنصات الإلكترونية؟
“أنا حابب جدا فكرة المنصات الإلكترونية لأنها بتواكب العصر، والعالم بيتطور كل يوم وهتلاقي في العالم كلو النوع دا أفضل، والناس كلها شايفة ان التلفزيون قرب ينتهي، والناس بتبقى شايفة إن المنصات أفضل، عشان بتخلينا نستغنى عن شيء بيزعجنا كلنا وهو الإعلانات ف عشان كدا جمهورها كثير، والشغل فيها مريح أكثر، وأنا حاليًا بتابع مسلسل في كل أسبوع يوم جمعة”.
ما الأعمال التي تشارك بها في السباق الرمضاني القادم؟
“أنا هشارك في مسلسل الاختيار، ولكن ضيف شرف،واتبسطت بالشغل مع أمير كرارة، حيث تجمعني به معرفة من زمان جدًا، وفرحت إنه ماتغيرش ولسه زي ما هو، وكلامه مع الناس حلو ومقابلته حلوة، وانا سعيد إني اشتغلت معاه، ولكن مش بعترف بدور ضيف الشرف لأن دا دور تصوير يومين وخلاص وفعلا دا اللي حصل”.
ما رأيك في ألبوم عمرو دياب ورامي جمال 2020؟
لم أسمعهم حتى الآن، قد يكون بسبب ضيق الوقت أو انشغالي المستمر، ولكن أكيد سأسمعهم، أنا سمعت منهم مقاطع بس مش أغنية كاملة”.
ما هي أعمالك القادمة؟
“أنا شاركت في عمل هايتعرض في منصة إلكترونية قبل رمضان، وهو أقل من 10 حلقات والتمثيل فيها مريح جدا مقارنة بالمسلسلات الـ 30 حلقة اللي ممكن تصور فيها 20 ساعة واليوم يتقلب، المنصات مريحة اكتر، وهايتم الإعلان عن العمل دا قريب جدا”.
لنختتم الحديث وتحكي لنا قصة الـ “الهاند ميد”؟
“أنا بحبه، وعايز اوصل الفكرة لولادي فكرة إنهم يعملوا كل حاجة بايدهم، عشان يتعلموا ويعرفوا إنهم مش أحسن من الشخص اللي بيشتغل الحاجة دي، ولا هو احسن منهم ولحد دلوقتي بشتغل بإيدي في حاجات كتير خصوصا في الإجازات، أنا ممكن أقوم الصبح أبيض البيت، كمان عندي الورشة بتاعتي بصنع فيها الأثاث وبتساعدني في تفريغ الطاقات السلبية وتغير مزاجي إلى الأحسن، وحاليًا بحب أصحى بدري عشان أبدأ اليوم بشكل صحيح”.
