وائل الإبراشي: أتمنى الوزير يكسفنا وينتصر علينا.. هكون مبسوط بالهزيمة لأننا هننقذ الناس
شهدت الليلة الماضية، مداخله تلفزيونية لوزير النقل، الفريق كامل، مع الإعلامي وائل الإبراشي، تحولت في النهاية إلى مشادة بينهما إثر مقطع فيديو يظهر الزحام والتكدس بين المواطنين في قطارات المترو، بالرغم من اتخاذ الدولة حزمة من الإجراءات الاحترازية لتقليل الزحام بين المواطنين؛ والحد من انتشار فيروس كورونا المستجد “كوفيد-19”.
البداية جاءت خلال حلقة أمس الأحد، من برنامج “التاسعة” المذاع على التلفزيون المصري، وإذاعته لفيديو يعرض الزحام في قطارات المترو، وهو ما أثار غضب الوزير قائلًا: “الفيديو من يوم الأربع في أول ساعة لتطبيق الحظر والصورة دي انتهت تمامًا.. هات صورة يوم الخميس والجمعة والسبت وأعرض صورة النهاردة”.
وأضاف الوزير: “مش مقبول تطلع صورة النهاردة وهي متصورة يوم الأربع بعد الحظر بـ5دقائق.. حضرتك اتعب وأنزل معايا المترو وشوف، ركبت كل القطارات ومفيش زحمة في المترو”.
ليرد الإبراشي: “وأنا بقول لحضرتك إن لسه في زحام يا سيادة الوزير”.
ويكمل الفريق كامل: “بقول لحضرتك أنا كنت هناك النهاردة، انت ماروحتش ماشوفتش”، ويكمل: “انت إعلامي محترم، والإعلامي المحترم يعرض الصورة النهارده مش صور قديمة”. وأنهى وزير النقل المداخلة قائلًا: “بشكرك يا أستاذ وائل.. واللي عملته الحكومة أنا قلته في برامج أخرى”.
وقال الإبراشى: “لما بنعرض ده الهدف هو إنه حال الزحام دى متحصلش تانى، وحالة التكدس دى ميحصلش تانى”، مضيفا: “القضية مش قضية مسؤوليات فردية الآن، الناس كلها في مركب واحد، يبقى الناس كلها تتحمل المسئولية من مجهود بشرى والمسئولين في قطاعا الدولة المختلفة”.
واسترسل: “من حق الوزير يدخل بالشكل ده، قلنا اللى عندنا واللى علينا، وهو دخل عبر عن موقفه بالطريقة اللى هو عاوزها، ولو الناس شافت زحاما شديدا في محطات المترو يقول، من اللى أخطأ، وأتمنى إن الوزير يكسفنا وينتصر علينا، والشعور بالهزيمة أكون مبسوط بيه لأننا بيه هننقذ الناس، لو قالنا تعالى معايا، مستعد أروح معاه”.
وأضاف: “خلى الوزير يضربنا بالضربة القاضية ومنلاقيش المترو زحمة، وبهذه العصبية بيقول إننا مش هنلاقى ناس، وساعتها أقوله هزمتنا يا سيادة الوزير، اهزمنا بما يخدم المصلحة الوطنية، احنا بنعرض مشاهد موجودة على أرض الواقع، ولو شوفتوا بعضها غدا هيبقى موقفك ايه، أتمنى منشوفهاش، وهو بلدياتى وأعتز بيه، والناس داخلة كأنه تراشق شخصى، والمهم بكرة منلاقيش زحام، ولو لقينا زحام هيبقى موقف الوزير مش لطيف، والمهم في النهاية المصلحة الوطنية، لا أنا عاوز أبقى وزير نقل مكانه ولا حاجة”.
وأخيرًا قال: “بينا وبينه احترام كبير، وهو من الشخصيات التي عهد اليه هذه المهمة لأن له تاريخ كبير من الإنجاز، ونتمنى الإنجاز مستمر، ويبقى مفيش زحام”.
