نجل سمرة الراوي: "أقسم بالله ما أعرف حاجة عن اللي بتقوله.. وإزاي هطردها من البيت؟"
علق ياسر جمال، نجل السيدة سمرة الراوي، الناجية من حادث قطاري سوهاج، على ما ذكرته بشان طرد ابنها لها من المنزل قبيل استقلالها للقطار.
وقال جمال في مداخلة هاتفية ببرنامج “كلمة أخيرة”، المذاع على قناة “أون إي”: “أقسم بالله ماعرف حاجة عن القصة اللي قالتها غير الكلام اللي وصلني من الناس.. عاوز أفهم منها القصة؟ وليه بتقول كده؟”.
وأضاف: “عاوز أعرف الأسباب منها؟”، وسألته الإعلامية لميس الحديدي: لماذا لم يذهب لرؤيتها في المستشفى بعد نجاتها من الحادث؟، فرد قائلاً: "أنا ماعرفتش غير لما الجيران خبطوا علينا وقالولي على الحادثة وربنا يشهد على حالي.. أنا قاعد من الشغل ومافيش معايا فلوس رحت استلفت الفلوس عشان أروحلها".
وواصل نجل السيدة: "فيه ناس اتصلت بيا وأنا في نص الطريق وقالولي إرجع أمك عملت لايف وقالت إنك ضربتها وطردتها وهددتها بالقتل وقالولي لو رحت هناك مش هتعرف ترجع بيتك تاني وقالولي خليك عندك لحد ما نقعد مع والدتك ونفهم منها".
وأكمل: “ أنا بعتلها إخواتي البنات عشان يطمنوا عليها فرجت عليهم الناس، وقالت معرفكوش ليه جايين هنا.. أنا بار بيها وربنا يشهد عليا".
وعن أسباب غضبها الجم، قال: "مشاكل عادية تخص المعاش والمشاكل والمصاريف اللي إحنا فيها عايشين في ضغط، لكن أقسم بالله ما مشيتها من البيت، إزاي ضميري هيسمح بكده".
وكشف أن المنزل الذي ذكرته والدته وأنه قام بطردها منه إرث عن والده وللورثة، وهو يقيم معها فيه، قائلًا: "بيت أبويا، وبعد ما توفي قعدِت فيه مع جوزها التاني الذي حصلت في أعقاب وفاته على معاش، لكن أبويا ماكنش موظف ماسبش معاش ليها لأنه كان أُجَرِي وصياد في البحر".
واستطرد: "الخلاف كان عادي مافيش فيه كل المشاكل دي، كل الناس بتتخانق لكن مفيش أي حاجة من اللي قالتها أنا عملتها".
ووجهت الإعلامية لميس الحديدي، رسالة له قائلة: "روح دور على أمك هي الآن في دار مسنين، واحذر غضب الأم لأنه تتهدله جبال، فعقب قائلًا: "نفسي صعبانة عليا من الكلام ده وربنا يكفينا شر غضب الأم".
