ملخص تصريحات روبي مع منى الشاذلي : خالاتي قاطعوني بسبب الفن وصليت استخارة لأول مرة بسبب ابنتي
حلّت الفنانة روبي ضيفة على برنامج معكم، مع الإعلامية منى الشاذلي، الذي تقدمه الإعلامية منى الشاذلي، على قناة cbc، لتتحدث عن بداياتها في المجال، والصعوبات التي واجهتها، كما تحدثت عن حياتها الشخصية مع أسرتها.
تصريحات روبي مع منى الشاذلي
في البداية، قالت روبي إن جدها لوالدتها، صعيدي، وتخلى عن أخذ الثأر الخاص بالعائلة، وعمل موظفا في وزارة الري، وكان يتمنى إنجاب ولد؛ لكن الله رزقه بـ 7 بنات، موضحة: جدي صعيدي، وكان عنده تار ما أخدوش، كان موظف في وزارة الري، وكان حابب يجيب ولد، لكن ربنا ادَّاله 7 بنات، لدرجة إن جدتي ماتت بـ سُكَّر الحمل؛ من كتر ما هو مُصِرّ على الخِلفة ورا بعض عشان يجيب ولد، بس الـ7 بنات دول كانوا أجدع من 100 راجل، وأنا اتعلمت منهم الاعتماد على النفس.
وأضافت روبي، أن خالاتها قاطعوها ؛جميعا حينما عملت في المجال الفني، وبدأت تقديم الكليبات، قائلة: في بدايات عملي، حصلت لي أزمة؛ بسبب ردود فعل الناس وقرايبي.. لدرجة إن خالاتي قاطعوني وقاطعوا ماما، بس بعد كده وقفت أنا مع نفسي وقفة، وفهمت اللي بيحصل، وقلت: هعيد صياغة الموضوع تماما، أنا مش مُلَخَّصَة في غنوة ولا رقصة، وقعدت كتير، وبعدين عملت سجن النسا.
وأوضحت أنها كانت متمردة للغاية في طفولتها، وحينما توفي والدها؛ منعت والدتها من الزواج، وهو ما تندم عليه الآن، وتعتبره أنانية وظلمًا ارتكبته في حقها، قائلة: أنا كنت متمردة جدا.. يعني مثلا بابا مات وماما عندها 34 سنة، بعدها كان بيجيلها عرسان، فأنا أتخانق وأتجنن، وهي تقول: بنتي هتضيع مني، وتخاف عليا، فرفضت الجواز بسببي، لكن أنا دلوقت بضرب نفسي بالجزمة، إن أنا ماخليتهاش ترتبط؛ لأن أنا كده ظلمتها، وده كان أنانية مني.
في السياق نفسه، أشارت إلى أن روبي، اسم فني بحت، ولا تتعامل أسرتها معها به، بل الكل في المنزل يخاطبها بـ رانيا، منذ أن دخلت المجال إبان فترة الثانوية العامة، وتحديدا في السنة الثانية.
ولفتت إلى أنها لم تكن تسعى للشهرة، ولم تتخيلها أبدًا، قائلة: وأنا في تانية ثانوي دخلت المجال كموديل إعلانات؛ عشان أجيب فلوس آخد بيها دروس، أو أشتري لبس وغيره، لكن عمر ما كان في بالي أبدا إني أتشهر، داخلاه بهدف مادي بحت، لكن فجأة لقيت نفسي اتشهرت، طموحي أصلا في البداية وقبل أي حاجة وأنا صغيرة إني اشتغل موظفة واتجوز واقعد في البيت.
وبسؤالها عن ابنتها: طيبة؛ قالت روبي: إن ابنتها غيّرت من طباعها وتصرفاتها، وجعلتها مسؤولة بشكل أكبر، موضحة أنها صلّت استخارة لأول مرة في حياتها؛ لكي تختار اسم ابنتها، قائلة: بنتي هي اللي بتربيني مش أنا اللي بربيها، عندها 7 سنين، بس تربية الأطفال صعبة جدا، طيبة ده الاسم اللي أنا اختارته ليها.. وكان أول مرة في حياتي أعمل استخارة كان في الاسم ده، لأن في الأول كنت عاوزة اسميها تحية لكن الناس اتَّريَقِت عليا، فاستقريت على ده.
واختتمت تصريحاتها: ابنتي علمتني إن أنا ابقي مسؤولة أكتر، وإني أصون لساني؛ لأن أنا كنت بشتم، يعني مثلا بكلم صاحبتي في التليفون وواخدة راحتي، فأشتم، لكن دلوقت لأ، علمتني الأدب.
