عزة بهاء: كنت برفض أتصور مع الجمهور لأني معرفهمش
تحدثت الفنانة عزة بهاء، عن الشائعات التي طالتها والفنانة منى زكي، في وقت سابق، بمنع المصورين من ممارسة عملهم.
وأوضحت عزة بهاء، في تصريحات تلفزيونية: كنت بعمل مسرحية إخرج أستاذ شاكر خضير الله يرحمه، كان اسمها شقع بقع، وكل يوم المصور بتاع الصالة بيجب ناس تتصور مع الفنانين في الكواليس، كنت بقول له معلش أنا مبحبش أتصور لأني معرفهمش علشان أتصور معاهم.
وتابعت: الراجل آخر ما زهق راح اشتكى لـ أستاذ أحمد بدير، قاله إن أنا ومنى زكي، مبيرضوش يشتغلوا، أنا أتوقف حالي، وأستاذ أحمد قالي لازم تتصوري مع الناس ده جزء من الشغل وده شيء عادي.
وأضافت: كنت صغيرة وقتها وكنت شايفة إن أتصور معاهم وأنا معرفهمش إزاي يعني؟ أو هيعملوا إيه بالصورة، وبعدين عرفت واتعودت إن الوضع ده طبيعي.
عزة بهاء تكشف سبب غيابها
كما كشفت عزة بهاء، سبب غيابها الطويل عن الساحة الفنية، قائلة: أنا بشتغل بس قليل، مبحبش أعمل أي حاجة وأعمل الحاجة اللي تكون عجباني يعني أكون بشتغل وأنا مبسوطة، والبيت خدني شوية كتير من 20 سنة، كنت بنزل أشتغل بس قليل.
وتابعت عزة بهاء، أن المخرجين حصروها في نوعية واحدة من الأدوار، موضحة: حصروني في شخصية الهانم والوحيدة اللي خرجت عن السياق ده الأستاذ رباب حسين في مسلسل الليل وآخره، هما حصروني في الأدوار دي لأني نجحت فيها الأول، وفي الأول كنت مضايقة وكنت بقول الفنان بيعرف يعمل كل الأدوار وأنا بعرف أعمل أدوار تانية، ولكن بعد شوية لقيت إن دي وجهات نظر وإن دي شغلانة المخرج لو هو قادر على تطوير الممثل أو تطويعه، وهيقدر يخرج منه اللي هو عايزه.
