سهير رمزي: الحب أحلى حاجة في الدنيا.. وأندم على عدم الإنجاب
كشفت الفنانة سهير رمزي عن معنى الحب بالنسبة لها، إذ أكدت أنه أحلى حاجة في الدنيا، كما تحدثت عن ندمها لعدم إنجابها.
سهير رمزي تتحدث عن الحب
وقالت الفنانة سهير رمزي في تصريحات تليفزيونية، إن الحب مبني على الصدق، وأشارت إلى أنها لا تستطيع الحياة من غير الحب، قائلة: الحب دا أحلى حاجة في الدنيا ومقدرش أعيش من غيره وهو مبني على الصدق، يعني لو أنا بحب المياه جدًا ومفهاش صدق مش هشربها، ولو متربة بس فيها صدق هشربها.
وأكدت الفنانة سهير رمزي أنها نادمة على عدم إنجاب طفل، وعلقت: كنت أنانية جدًا لما حبيت سهير رمزي أكتر ما حبيت أن يكون عندي طفل، والحاجة الوحيدة اللي ندمت عليها هي أني مجبتش بني آدم أو ابن يقف جمبي.
وتابعت: أنا كنت من النوع اللي خاف يجيب طفل، ولو كنت خلفت وأنا بمثل كنت قعدت في البيت، وفكرت إني أتبنى طفل قبل كدا بس من غير ما يعيش معايا عشان هتبقى مسؤلية، فكرت أتبناه بس من بعيد.
كما أشارت إلى أنها كانت تختار بقلبها وعقلها ثم بعد ذلك أصبحت تفكر بقلبها فقط، موضحة: كنت سايبة نفسي لقلبي فقط ومش عايزة عقلي يشتغل وقلبي ورطني كتير واندفعت وتسرعت كتير وتراجعت بعد كده، ومندمتش على ده لأني مش بحب الندم واللي جاي هيكون أحسن أكيد وأنا بطبيعتي خوافة وبخاف من حاجات كتير.
وقدمت سهير رمزي نصيحة للفتيات المقبلين على الزواج، إذ قالت: لو كان عندي بنت وهي داخلة على جواز هنصحها إوعي تكذبي وعيشي حياتك صح ولو مش كويسة متكمليش، وأهم حاجة تختاري حد يتقي الله فيكي ويكون عنده أخلاق ولو هو كده أكيد هتكوني سعيدة والعمر بيجري ومش محتاجين نبرر الحياة الوحشة ونضيع العمر.
