رانيا محمود ياسين: أجرنا يعيشنا مستورين.. ومفيش حد فينا مُرفّه
كشفت الفنانة رانيا محمود ياسين نصيحتها إلى نجلها عمر، مشيرة إلى أنها تنصحه دائمًا أن يحترم عمله، ولا يعتمد على التمثيل فقط.
وقالت رانيا محمود ياسين لـ القاهرة 24: ابني خريج إعلام وعنده مشاريعه الخاصة، ويعمل في ورشة الإبداع مع خالد جلال.
وأضافت: بنصح عمر ابني إنه يلتفت لشغله، ويهتم به ويحترمه ويحبه وما يعتمدش على التمثيل بس، لأنه يوم فوق ويوم تحت والراجل بذات اللي فاتح بيت ما ينفعش يعتمد على التمثيل فقط.
وتابعت: شغلنا يوم فوق ويوم تحت، وأول مهنة بتتأثر بالأحداث اللي حوالينا، مفيش دكتور ومهندس شغلهم اتعطل وقت الثورة، لكن الممثيلن مش مهم يمثلوا، علشان كده التمثيل والسياحة أكتر حاجتين بيتأثروا لأنهم بيعتبروهم ترفيه وفي بيوت فنانين كتير اتخربت وقت الثورة، لغاية ما الدنيا رجعت لحالها علشان كده الفن صعب.
واستكملت: أعتب على الإعلام لأنه أحيانًا بيكتب مانشت صغير متسفز.. وصورة لفنان بيقول مش عارف اشتغل ويحط صورة له.. وهو بيضحك ولبسه حلو.
رانيا محمود ياسين: أجرنا يعيشنا مستورين زي أي مهنة في الدولة
وواصلت رانيا محمود ياسين: إحنا أجرنا يعيشنا مستورين زي أي مهنة في الدولة، وكمان بنطلع من جيبنا علشان مش عارفين نوفر، ومعظمنا ما عندوش ترفيه كله التزام ومسؤوليات والترفيه في الآخر إذا نفع، وكلنا بفضل رب العالمين مستورين مفيش حد فينا مرفه، وهما نجم أو اتنين اللي بياخدوا أرقام كبيرة عشان بيجيوا إعلانات وبيبعوا بأرقام كبيرة، وبالتالي المنتج مستفيد.
واستكملت: الناس فاكرة إن كل الفنانين بياخدوا كده.. ده مش حقيقي زينا زي أي مهنة يتقال عليها مستورة، إحنا زي أي حد مهنته بتديه أجر يعيشه مستور مش غني، ومفيش أرقام واو الدنيا غليت وكلنا عندنا التزمات من مصاريف ومدارس وجامعات، والناس فاكرة إن الفنانين كل يوم بيلفوا العالم.
