محمود الليثي: في بدايتي كنت محتار أكمل في مجال الهندسة ولا الغناء.. ولما عملت أول شريط دغدغ مصر
كشف الفنان محمود الليثي، كواليس بدايته الفنية وأول أغنية في مشواره الفني، كما روى موقفًا طريفًا له خلال إحيائه أحد الأفراح بالصعيد.
وقال محمود الليثي، خلال ندوته بالقاهرة 24، عن فترة ما قبل بدء مشواره الفني: بعد تخرجي من كلية الهندسة وحصولي على شهادة الجيش كنت ماسك الشهادة، وبقول يا رب أعمل إيه أكمل هندسة ولا غنا، وزوج اختي هبة كانت في السعودية، وكانت عاوزة تسافر لجوزها، وكان لازم يكون معاها محرم روحت معاها ورجعت حالق أقرع وبدقن.
وأضاف: لما رجعت قابلني منتج كبير اسمه خالد عمر قالي نعمل شريط، قلت له أنا مش لاقي آكل، وأنا كنت بغني في الأفراح، واختي كان معاها فلوس جمعية قلت لها اديني الفلوس سلف وفعلًا خدت منها 10 آلاف جنيه، ودخلنا عند عمر فودة وهو أحسن مهندس صوت قال لي فين المطرب لأن شكلي ما يدلش إني مطرب، ولأنه كان متربي في ألمانيا قال لي غني مسكت المايك قدمت أغنية العنب قال لي هو مين العيل الصغير اللي بيغني معاك قلت له أنا صوتي لما يعلى بيكون كده، ونزلي وقال لي يا نهار أسود أنت معجزة ولما سجلنا الشريط نزل دغدغ مصر.
محمود الليثي: الصعايدة هما وتد مصر
وروى محمود الليثي موقفًا طريفًا خلال غنائه في أحد الأفراح بالصعيد في بدايته، قائلًا: مرة دخلت فرح جه راجل قال لي لازم تجيب أخوك الصغير قلت أنا والله أنا، ما صدقش لحد ما سمعني بغني.
وأضاف: أنا عشقي للصعايدة وهما وتد مصر فيهم رجولة وأهل الكرم وطول عمري ما عاشرهم ومالهمش علاقة بالكوكب لأنهم ولاد أصول وشبعانين.
