مصمم الأكشن عصام الوريث: محمد رمضان نجم مصر الأول في المعارك والأكشن.. ويرفض الاستعانة بـ دوبلير
كشف مصمم الأكشن عصام الوريث، كواليس مشهد الضرب بين الفنان محمد رمضان والفنان أحمد عبد الله، الذي يجسد شخصية كارم في مسلسل جعفر العمدة.
وقال عصام الوريث في لقائه مع القاهرة 24، عن تفاصيل مشهد الضرب الشهير بين جعفر العمدة وكارم فتح الله خلال أحداث مسلسل جعفر العمدة: هدفنا في مسلسل جعفر العمدة نعمل حاجة المشاهد يفكرها حقيقية ويحبها ويصدقها، والأستاذ محمد سامي كان مُصر إن كل حاجة تتعمل شبهنا أوي، الموضوع كان صعب، ولكن البروفات كانت كتير ونسبة الخطأ كانت زيرو، والحمدلله المسلسل قدر يوصل لكل بيت، ويمكن ده أول عمل في حياتي الناس تسأل محمد رمضان هيضرب وهينتقم إمتى، وده في حد ذاته نجاح.
وأضاف: خناقة جعفر العمدة وكارم كانت خناقة فيها كل نجوم العمل، وفيه رعب فمكنش ينفع يكون في خطأ، وقعدنا يوم كامل نصور فيها وعملنا قبلها يومين بروفات.
وأكمل مصمم الأكشن عصام الوريث، مشيدًا بـ أداء الفنان محمد رمضان: محمد رمضان شهادتي فيه مجروحة من أيام معملنا مع بعض فيلم الألماني، هو نجم معارك وفي رأيي هو أقوى ممثل موجود في مصر، ودلوقتي أقدر أقول أقوى نجم أكشن الأول في مصر محمد رمضان بلا منازع.
واختتم: أن إحنا نوصل للمشاهد إن كل حاجة فيه بجد ده النجاح، وشرف لأي نجم في الدنيا إنه يستعين بـ دوبلير وده مش ضعف منه، وفي جعفر العمدة كان معانا دوبلير ولكن أستاذ محمد رمضان عمره ما استعان بـ دوبلير.
أبطال مسلسل جعفر العمدة
وضم مسلسل جعفر العمدة العديد من الفنانين مع محمد رمضان، وهم: إيمان العاصي، مي كساب، زينة، منة فضالي، هالة صدقي، دعاء حكم، عصام السقا، مجدي بدر، منذر رياحنة، أحمد عبد الله، طارق النهري، أحمد فهيم، جوري بكر، سلوى عثمان، أحمد داش، بيومي فؤاد، لبنى ونس، والعمل من تأليف وإخراج محمد سامي.
