ياسمين عز تعلق على جدل مطالبة شاب لخطيبته بقائمة الهدايا: الراجل بعد ما يفسخ بيصلي ركعتين شكر
علقت الإعلامية ياسمين عز على جدل، مطالبة شاب لخطيبته بقائمة الهدايا والخروجات خلال فترة خطبتهما وذلك بعد انفصالهما، حيث تداول مستخدمو مواقع التواصل الاجتماعي صورة لقائمة الهدايا والخروجات وأسعارهما وهو ما أثار ضجة كبيرة.
وقالت ياسمين عز خلال برنامج كلام الناس: الناس بقى لها كام يوم بتتكلم عن ورقة، لا يعلمون مصدرها ومدى صحتها ولا حقيقتها، ولا هي مفبركة أو لأ، ولا حاولوا يعرفوا ومعظم البنات بتكتب خطب عنها علشان الورقة دي على حد فهمهم بتقلل من الرجل وتقلل من كرمه وأخلاقه، وأنا بقول لك لأ لا الورقة ولا عشرة غيرها تقدر تنال من الرجل أو تقلل من احترامه.
وأضافت ياسمين عز: لو الورقة دي فيها حاجة ضد البنات كان اتعمل لها حذف وإلغاء من السوشيال ميديا، ولكن علشان راجل انتشرت، مبدأيا كده إيه اللي يثبت إن الورقة حقيقية، وهل في احتمالية يكون مصدرها واحدة ست عاوزة تشوه من سمعته.
وأردفت: الفرعون منبع الكرم واللي بنى الهرم ومصدر العطاء والحنان، مستحيل يطلب من واحدة 20 جنيه في لعبة العربيات المتصادمة دي عمرها ما كانت أخلاق الفرعون.
واستكملت: رابعًا نفترض إن الورقة حقيقية، طيب ما ممكن يكون الراجل من حقه يسترد الشبكة والهدايا اللي جابها، والمفروض البنت وأهلها من نفسهم يرجعوا الحاجات، لإنه جايب الهدايا دي للبنت اللي هيتجوزها، فهل اتجوزها لأ، يبقى نرجع له حاجته، كنت بسمع من ناس في أهل التخصص إن الراجل في فترة الخطوبة يباخد شبكته والهدايا وبعد كتب الكتاب الموضوع بالنص وبعد الدخلة ما يخدش حاجة.
الراجل بعد ما يفسخ بيصلي ركعتين شكر
وواصلت ياسمين عز: الراجل لما خطوبته تتفسخ مش بيدور على شبكة وهدايا لكن بيدور على سجادة صلاة يصلي عليها ركعتين شكر لإن ربنا خلصوا من الموضوع وخرج منها على سلام، فأرجوكم بلاش نشير حاجات مش متأكدين منها علشان نسوء صورة الناس على الباطل.
ياسمين عز تطالب بإلغاء الهدايا
واختتمت: بدال ما نفبرك في ورق وقصص وحكايات، خلونا نغير من ثقافة الناس، وخلونا نلغي موضوع الهدايا ده أساسا، خاصة إحنا بنعاني من أزمة اقتصادية، فبدال ما خطيبك يجيب لك بابا نويل في رأس السنة خليه يجيب لك مترين قماش قطيفة علشان الصالون، وبدال ما خطيب بنتك يجيب علبة كحك، قولي له ادفعهم في ديب فريزر، لإن العريس الغلبان فلوسه بتروح في خروجات وهدايا وبعدين تسألوا هو الخطوبة بتطول ليه، وفي الآخر تسيبوا الراجل.
