بعد تصدرها التريند.. شقيقة عريس كفر الشيخ: أنا مش عمتو الحرباية وبتمنى لأخويا وعروسته السعادة
إوعي في يوم تزعليه ولا مننا تحرميه.. بهذه الكلمات أوصت شقيقة عريس من محافظة كفر الشيخ، العروس خلال حفل الزفاف، والتي ظهرت خلال مقطع فيديو عبر موقع التواصل الاجتماعي فيسبوك، لتصبح حديث السوشيال ميديا، يؤيدها البعض ويهاجمها البعض الآخر.
شقيقة عريس كفر الشيخ تروي كواليس الفيديو
وروت هبة جمال أبو عرب، شقيقة العريس، كواليس الفيديو المتداول عبر موقع فيسبوك، قائلة: محمد أخويا الوحيد وأنا أكبر منه بـ 4 سنوات، وحقيقي كلامي كله طالع من القلب ومكنش مفتعل زي ما الناس فاكرة.. دا أخويا وأنا فرحانة بيه وله، وكل الكلام اللي قولته في الفيديو مكنتش مرتبة له.. الموضوع جه صدفة.. في الفرح حسيت إني عايزة أوصي عروسته عليه قدام الناس كلها، وزي ما وصيتها عليه وصيته هو كمان عليها.
وتابعت هبة أبو عرب، أنا تفاجأت بالفيديو وإنه أصبح تريند، والفوتوغرافر مكنش حتى محضر إني أقول الكلام دا، أنا اللي وسط الفرح طلبت المايك، وبتاع الدي جي بقى ينادي على الحضور ويطلب منهم يسكتوا عشان يسمعوني، حقيقي كل كلمة قولتها كانت طالعة من القلب.
وأضافت هبة أبو عرب، تفاجأت برد فعل على مواقع التواصل الاجتماعي بخصوص الفيديو، وخاصة من التعليقات السلبية، أنا كنت فرحانة بـ محمد أخويا وبفرحه وللأسف الناس فهمت الموضوع غلط، وكتير قالولي إنتي عايزة تبقى تريند، ولكن أنا معرفش إيه التريند دا، ولا عمري نزلت فيديو على الفيسبوك، ووافقت على فيديو الفرح لأن دا شغل المصور، ومن حقه إنه ينزله.
واستكملت هبة أبو عرب شقيقة عريس كفر الشيخ، محمد أخويا الوحيد وابني وصاحبي وكل حاجة بالنسبة لي، وهو فرحتنا الكبيرة، ويوم الفرح شريط حياتنا كله مر قدام عيني، واحنا بنلعب لما كنا صغيرين وإحنا بنضحك وبنهزر وبنتخانق.. ذكريات طفولتنا كلها مرت قدامي يوم الفرح.. فكان طبيعي أقول الكلام دا وأوصي مراته عليه قدام الدنيا كلها.
وقالت هبة أبو عرب، أنا عارفة إن عروسة أخويا بنت ناس وتعرف الأصول ومحترمة ومؤدبة.. ربنا يبارك لها يا رب ويحسن لأهلها اللي أحسنوا تربيتها، وفعلًا كلامي في الفيديو طلع من القلب ومكنتش عاملة حسابي عليه وطلع من القلب بكل تلقائية.
شقيقة عريس كفر الشيخ ترد على انتقادات السوشيال ميديا
ووجهت هبة أبو عرب، كلمة للمتنمرين عليها والساخرين منها، قائلةً: اتقوا الله ومتتكلموش على بني آدم غير لما تعرفه كويس وتعاشره، مش كل الناس زي بعضها.. صوابعك مش زي بعضها، أه أنا عارفة إن واحد يحبك وعشرة يكرهوك، ولكن أنا مش عمتو الحرباية ولا مرعبة أكتر من فيديو القرش زي ما الناس قالت، بالعكس أنا مش بتمنى غير كل خير لأخويا وعروسته وإن ربنا يرزقهم السعادة وراحة البال ويرزقهم الذرية الصالحة.
