جوري بكر بعد نبأ طلاقها: مش محتاجة اطلع تريند وحالتي النفسية سيئة
علقت الفنانة جوري بكر على نبأ طلاقها من رامي أحمد قبل أشهر من ولادتها طفلها الأول، مشيرةً إلى أنه تم اختراق حسابها على انستجرام وشخص ما قام بارتكاب تلك الجريمة، وتسبب لها في أذى نفسي.
جوري بكر: نفسيتي سيئة وربنا ينتقم ممن تسبب في شائعة طلاقي
وقالت جوري بكر لـ القاهرة 24: الحمد لله مفيش طلاق أنا جوزي راجل محترم معتقدش إنه يعمل كده مع واحدة مراته اللي فاضلها شهور وتولد، واللي عمل كده ده بني آدم أو بني آدمة ربنا ينتقم منهم وحسبي الله ونعم الوكيل.
وتابعت جوري: مش قادرة أتخيل إن فيه بني آدمين منتظرين سقوط بني آدم أو منتظرين يدمروا بني آدم بالطريقة السيئة دي، بس الحمد لله قدر الله وما شاء فعل، رجعت الأكونت ومفيش حاجة حصل واحنا بخير وإن شاء الله الدنيا تعدي على خير.
وأردفت جوري بكر: يعني أنا تقريبًا حالتي النفسية سيئة بسبب اللي حصل فيا ده بس الحمد لله، يعني تفتكرواواحدة زيي في الوضع اللي أنا فيه ده محتاجة اطلع تريند؟
جوري بكر عن نبأ طلاقها: مش محتاجة أطلع تريند
وأضافت جوري بكر: الحمد لله طالعه تريند ومش محتاجة اطلع واعمل حاجة سيئة زي دي عشان اطلع بيها تريند حتى لو كنت متعصبة وكتبت حاجة زي دي على السوشيال ميديا، عمري ما هكتب حاجة زي كده، أضر بيها نفسي وأضر بيها جوزي وأضر بيها اللي في بطني وأهل بيتي وبيت جوزي مش حاجة لطيفة.
واختتم حديثها قائلةً: مش حاجة لطيفة هجوم البني آدمين بالطريقة دي ويفكروا إني عايزة أعمل تريند أنا مش محتاجة ولا مستنية أعمل حاجة زي كده يا جماعة اللي حصلي موضوع مؤذي نفسيًا من اللي حصلي على الانستجرام واللي نزل على السوشيال ميديا.
