محمد زيدان: أمير كرارة مبيعملش حاجة وحشة.. وانتظروني في تجربة تمثيل قريبًا
أشاد محمد زيدان لاعب منتخب مصر السابق بالفنان أمير كرارة، كما حرص على حضور العرض الخاص لفيلمه البعبع بالأمس، في إحدى سينمات منطقة التجمع الخامس.
وقال محمد زيدان خلال لقائه مع القاهرة 24: أمير كرارة أي حاجة بيعملها جامدة جدًا وشوفت التريلر وعجبني، ومبسوط بفكرة الفيلم واللقطات والمشاهد اللي شوفناها في التريلر، وفكرة أمير كرارة وياسمين صبري مع بعض حلوة جدًا وأتمنالهم التوفيق مع بعض.
وأضاف محمد زيدان: أمير كرارة مبيعملش حاجة أي كلام أو بتقع أو وحشة، كل شغله جامد جدًا سواء في الدراما أو السينما، وياسمين صبري ديمًا وجودها إضافة وإنسانة ناجحة ولها طلة وحضور، إن شاء الله يكسروا الدنيا.
وأكمل زيدان: بنتهز الفرصة وأبارك لكل أصحابنا ونازلين في العيد وكلهم يكسروا الدنيا سواء تامر حسني وأحمد فهمي وكريم محمود عبد العزيز، كلهم أصحابنا وأخواتنا وحبايبنا، وبيقدموا فعلا حاجة بتبسطنا وسينما جميلة وعمل شاق بيقوموا بيه ولازم نقدر العمل والمجهود الجبار عشان نلاقي حاجة في الآخر نتفرج عليها وميبقاش اللي بنتفرج عليه أفلام أجنبية كلها.
أما عن إمكانية خوضه تجربة التمثيل خلال الفترة المقبلة، اختتم محمد زيدان حديثه، قائلًا: فيه تجربة قريب وهنعلن عنها.
العرض الخاص لـ فيلم البعبع
يذكر أن هناك العديد من الفنانين الذي حرصوا على حضور العرض الخاص لـ فيلم البعبع، بالأمس، منهم: الفنان أمير كرارة، ماجد المصري، محمد عبد الرحمن توتا، محمد فهيم، محمد أنور، ياسمين صبري، شريف إدريس.
