نور النبوي عن الحريفة: السوشيال ميديا مهمة لتسويق الفيلم.. والكواليس كان فيها هيستريا وضحك
تحدث الفنان نور النبوي عن كواليس فيلمه الحريفة الذي يعرض حاليًا بدور العرض السينمائي ويعد أول عمل من بطولته، وشاركه فيه كل من أحمد غزي، كزبرة، نور إيهاب، خالد الذهبي، عبد الرحمن محمد، سليم الترك وآخرين، مع ظهور خاص لـ بيومي فؤاد وشريف الدسوقي، بمشاركة أحمد حسام ميدو، لاعب كرة القدم السابق، والفيلم من تأليف إياد صالح، وإخراج رؤوف السيد.
نور النبوي يتحدث عن التعاون مع نور إيهاب
وكشف نور النبوي كواليس التعاون مع الفنانة نور إيهاب خلال لقائه على الراديو 9090 قائلًا: أول مرة نشتغل مع بعض وعملنا بروفات، والكيميا اللي بينا حصلت بسبب البروفات، لأننا كنا بنتكلم ونتناقش ونفكر ومش بس بنقرأ الورق، ولكن كنا حريصين إننا نعرف بعض وعرفنا شخصيات بعض، وهي لذيذة وبنت هادية وأتمتى اشتغل معاها تاني، والكواليس كانت مجنونة.
وأضاف نور النبوي عن الكواليس التي جمعته بباقي أبطال العمل: أحيانًا كنت بقعد لوحدي، لأني لما بدأت أقعد معاهم ما بقتش أعرف أروح التصوير، لأن هما مجانين وبيشغلوا أغاني ويجيبوا أكل وكان فيه حالة هيستريا، لكني ما شفتش أحلى من الكواليس والروح وما كناش بنحس بالتعب لأن الكواليس ممتعة، وكزبرة وغزي كانوا بيخلصوا تصوير ويستنوني أخلص تصوير ونمشي مع بعض، وقلت لهم أنا بفتكر هنيدي والسقا وطارق لطفي وهما بياكلوا آيس كريم مع بعض في فيلم صعيدي في الجامعة الأمريكية.
نور النبوي يتحدث عن التعاون مع كزبرة
وعن التعاون مع كزبرة وسبب التفاعل الكبير مع الفيديوهات التي كانوا ينشروها، قال نور النبوي: بقينا أصحاب بعد تصوير الفيلم، وهو قلبه أبيض وطيب وتلقائي وأنا بعشق التلقائيين، وكلهم دمهم خفيف ولذاذ وبقينا أصحاب وبنسافر مع بعض.
وعن أهمية الفيديوهات التي ينشروها سويًا من كواليس الفيلم قال النبوي: السوشيال ميديا مهمة لأي عمل نازل جديد، وبره في العالم كله بيعتمدوا على السوشيال ميديا، وزمان كل الممثلين في أمريكا لو عندهم فيلم جديد بيطلعوا في كل برامج تلفزيون الدولة وبيروجوا لفيلمهم، وأي فيديو لذيذ يسوق للفيلم حاجة حلوة لأن مهم نسوق للفيلم.
وعن الطفلة ريما مصطفى التي جسدت دور شقيقته في الفيلم قال: حبيبة قلبي وجات معانا مرة السينما وكانت بتسلم على الناس وبتقلدني، وهي خطيرة وبروفيشنال بطريقة غير عادية، وكانت أول واحدة حافظة الاسكربت، وهي محترفة وعارفة هي بتعمل إيه ونفسي أمثل معاها طول الوقت.
نور البنوي يتحدث عن تعاونه مع رؤوف السيد
كما أعرب نور النبوي عن سعادته بالتعاون مع المخرج رؤوف السيد قائلًا: اتبسطت جدا وبحبه وصديقي وهو بيعرف يخلي كل الكاست والكرو يبحبوه ويكونوا مؤمنين به وبيشتغلوا حتى لو تعبنا، وبعد 20 ساعة شغل نلاقيه بيضحك وعنده طاقة وإحنا بنموت وهو لسه محافظ على نشاطه وطاقته وشغفه وبيدينا دفعة عظيمة وإحنا بنشتغل، وكان رائع وجميل وطاقته حلوة وفاهم سينما ومشاعر وكاردات.
وأكمل: اتمرنا تلات شهور وتدريبات تلات شهور، كل يوم اسكربت وبنخرج مع بعض ونتقابل ونشتغل ونروح نتمرن خمس ساعات وده سيتسم وسبب من أسباب نجاح الفيلم.
وعن التدريبات على ممارسة الكرة قال: طول عمري بلعب كرة في المدرسة وليا أخ توأم حريف أكتر مني، وكنا بنلعب أنا وهو في فرقة في المدرسة وفي لحظة وقفت لما كنت في الجامعة، ولكن كنت بلعب على خفيف ولما رجعت اعمل تمرينات كنت سعيد لأنها وحشتني وبتفرج على الكرة وبشجع وأنا أهلاوي، وأتمنى كل فرق بلدي تكون قوية والأهلي ياخد الدوري.
وعن الصعوبات التي واجهته خلال التمرينات، قال النبوي: المشكلة مش في الكرة الفكرة في اللياقة البدنية، وأنا بتمرن وبجري ولو أنا ما كنتش بجري أو بتمرن وبلعب رياضات تانية كنت هتعب، وإحنا بنصور ماتش 15 ساعة ولازم أحافظ على طاقتي من الصبح لبليل وكانت أصعب المشاهد هي مشاهد الكرة.
