نور النبوي: عملت عمرة ودعيت ربنا فيلم الحريفة ينجح.. ومش في دماغي مين أبويا وبشتغل على نفسي
تحدث الفنان نور النبوي عن فيلمه الحريفة، والمخاوف التي كانت تواجهه قبل عرض الفيلم، مشيرًا إلى أنه كان كل ما يشغله هو نجاح العمل وخلال أدائه مناسك العمرة دعا الله أن ينجح العمل.
وقال نور النبوي خلال لقائه ببرنامج 9090: أنا بترعب دايمًا لأني عاوز أنجح ومش عاوز أعمل حاجة اتفرج عليها لوحدي لأني بعمل للناس، وأهلي كلهم على راسي لكن دايمًا الجمهور هو اللي نفسي اسمعه وعاوز الناس اللي ما تعرفنيش تشوف الفيلم وتتأثر بشيء وكنت مرعوب لأني عاوز الفيلم ينجح.
وأضاف نور النبوي: كنا في برنامج أنا وأستاذ طارق الجنايني مع منى الشاذلي وسألت كل واحد أمنيته إيه، وأنا كانت أمنيتي الفيلم ينجح ويجيب فلوس، لكن طالما صورت الفيلم خرج بره إيدي ومش مسؤول عن وقت عرضه ولا أي شيء وأي حاجة مش مسيطر عليها ما ينفعش تشغلني، لأني بركز في اللي بعمله ومشاريعي اللي بعملها، وبصلي وادعي وروحت عملت عمرة قبل العرض وقلت يا رب الفيلم ينجح.
وتحدث نور النبوي عن تأثير والده خالد النبوي على مشواره الفني وحب الناس له قائلًا: التمثيل شغلانتي، ومش في دماغي مين أبويا، هو نجم كبير وبحبه وبحييه لكن وأنا بشتغل مش في دماغي مين أبويا وبحاول اشتغل على نفسي، وعارف أن هيجي لحظة وكل ما أثبت أني استحق أني أكون موجود على الشاشة الناس هتستقبل ده لأن فيه حب بيني وبين الناس وأنا لامسه وأنا بحب الناس وبشتغل المهنة دي علشان الناس وأي تقدير من الناس حتى لو قالوا أنهم بيحبوني عشان والدي مش هزعل لأن دي مش حاجة اتنصل منها ومعنديش مشكلة معها.
وتابع نور النبوي: بفرح لما يقولوا الولد ده موهوب أو نور يستاهل نروح له فيلم أو نور غير حاجة في مشاعرنا وخلالنا عندنا أمل، أنا بشتغل وماشي على الخط ده ومش شايف خالد النبوي، والناس لما بتشوفوا زيي بتبسط، وبكون سعيد لما الناس بيحسوا أني شبهم ومنهم وبيقولوا لي إنت زي ابننا.
