عمرو سلامة: وسط البلد مبتجيبش إيرادات.. بنعمل أفلام لجمهور سينمات المولات والخليج
أعرب المخرج عمرو سلامة، عن استيائه بسبب قلة مشاركة الأفلام العربية والمصرية في المهرجانات الفنية، مؤكدًا أن الصناعة في الوقت الحالي تنتج أفلام لفئة مُعينة من الشعب.
وقال عمرو سلامة، خلال حواره مع الإعلامية إنجي علي، في برنامجها أسرار النجوم، عبر إذاعة نجوم FM: القانون واحد ومفيش معايير واضحة، اللي بيفرق حقيقة هو توجه عام أن قد إيه إحنا عايزين نفتح ونقفل، كان في فترة تخوف من أحداث سياسية واجتماعية، وكنت متفهم ده، والنهاردة أنا شايف أن في دولة قوية ومستقرة تخلينا نفتح وناخد خط نقدر نعبر عن نفسنا.
وتابع: الجمهور المصري مبقاش طرف في المعادلة، النهاردة معظم دخل الفيلم بيبقى يا إما من طبقة قليلة جدًا في مصر، أن تبقى أسرة تقدر تروح السينما تدفع 1000 جنيه في ساعتين ودي طبقة قليلة جدًا في مصر ودي ممكن اسميها طبقة الكومباوندات أو الطبقة الراقية في مصر، يا إما الدخل بيجي من التوزيع الخارجي وإيراداته في دول الخليج.
وأضاف عمرو سلامة: فأنا دلوقتي بقيت أعمل فيلم بخدم فيه على جمهور الكومباوندات وجمهور دول الخليج، فجمهور الشعب العادي اللي كنا بنسنتنى إيراداته في سينمات وسط البلد والأقاليم مبقاش موجود، سينمات وسط البلد مبقتش تطلع فلوس زي سينمات المولات.
عمرو سلامة: جمهور سينما المولات هو اللي بيشترك في المنصات
وأردف: هنقول إن جمهور السينمات اللي في المولات هو جمهور اللي قادر يدفع تذكرة سينما، وهو اللي بيشترك في منصات، وهو اللي بيشتري المنتج اللي في إعلان رمضان، بالتالي الشعب مبقاش زبون لأنه ولا هيدخل السينما ولا هيشتري وحدة في كومباوند لما يشوف إعلانها في رمضان، ولا هيشترك في منصة يدفع لها بالشهر.
واستكمل: والصناعة كلها بقت في إتجاه إننا نعمل حاجة متزعلش حد، فالـ 10 سنين اللي فاتوا في السينما فيها حاجات متزعلش حد، النهاردة 80% من الإيرادات بيجي من سينمات المولات، فأنت دلوقتي بتعمل سينما لجمهور المولات وجمهور الخليج، ولكن فرصة إنتاج أفلام شبه الشعب أو شبه أصحابها ضعيفة جدًا ومش لاقية دعم، وبتواجه رقابة هي مش فهماها، كل ده بيخلينا لما نعمل مهرجانات فنية مش لاقيين فيهم أفلام عربية
كما طرح المخرج عمرو سلامة، بعض الحلول للمساعدة في إنتاج أعمال سينمائية تشارك في المهرجانات الفنية، قائلًا: علشان نحل ده الخطوات واضحة جدًا، أولًا أن سياسيًا يتفهم أن السينما مهمة، وثانيًا يكون في قرار سياسي إننا نفتح شوية للإبداع والسينما، ثالثًايبقى في سُبل دعم من غير ما تدي فلوس زي أماكن التصوير وتشيل من عليها الضرائب، ده هيخلي عندنا كل سنة 10 أفلام يدخلوا مهرجانات.
