حسام حسني: التسعينيات مكتبة الموسيقى العربية.. وليا الشرف إني حامل لقب دكتور
تحدث الفنان حسام حسني عن نجوم جيل التسعينيات، مؤكدًا أن هذه الفترة تعتبر هي مكتبة الموسيقى العربية، بجانب حديثه عن تفاصيل حصوله على الدكتوراه في الأنواع الموسيقية الجديدة خلال آخر 20 عاما.
وقال حسام حسني، في تصريحات تلفزيونية: فترة التسعينيات جت بعد فترة الثمانينات اللي كانت لسة شكلها بيتشكل، وكلنا عارفين أن من بعد موت العندليب عبد الحليم حافظ كل ده كان تجارب، والتجربة نضجت في التسعينات، حتى يقولك أغاني التسعينات مش الثمانينات، وأول ما بزغ العقد بتاع التسعينيات كان في فنانين مكانوش في الثمانينات، زي أنا وحميد الشاعري ومحمد محيي وهشام عباس وحكيم ومصطفى قمر محمد فؤاد وعمرو دياب ومحمد الحلو ومحمد ثروت، وكل واحد فينا كان ليه بصمته.
وتابع حسام حسني: فترة التسعينيات بقت مكتبة الموسيقى العربية، وأنا اشتغلت كموزع وملحن مع كارم محمود، ليلى نظمي، هاني شاكر، عمرو دياب، محمد الحلو، محمد محيي، سيمون، أحمد الشوكي وغيرهم كتير.
حسام حسني يكشف تفاصيل حصوله على الدكتوراه
كما كشف الفنان حسام حسني، تفاصيل حصوله الدكتوراه، قائلًا: أنا بتشرف إني حامل لقت دكتور وده لقب كبير جدًا ومهم جدًا، ورسالة الدكتوراه بتاعتي كانت عن آخر 20 سنة وعنوانها كان الظواهر الغنائية الجديدة في الأغنية المصرية في العقدين الأوليين في القرن الحادي والعشرين، ودي سمات كل عصر، وفي حاجات جديدة بتطلع والناس بتحبها، وكل واحد بيحب بطل جيله.
وأضاف: الدائرة اتسعت شوية وبقى في ألوان غنائية تانية وبقى ليها جمهور تاني من فئة عمرية مختلفة، زي كاريوكي والرابرز، وأنا عملت مع كاريوكي مسلسل ريفو وحسيت إن فيه نوستالجيا شبه فيلم آيس كريم في جليم، ووافقت على طول.
