يسرا: فيلم ليلة العيد قاسي والجمهور هيسأل منجحش ليه.. وعمري ما عملت إلا أدوار البطولة
أعربت الفنانة يسرا، عن سعادتها بتقدم فيلم ليلة العيدة، كما كشفت أنها لم تقدم إلا دور البطولة منذ بداية مسيرتها الفنية، وتفاصيل عملها مع المخرج الراحل يوسف شاهين.
وقالت يسرا في تصريحات إذاعية: فيلم ليلة العيد قاسي جدًا وصادم وسعيدة أن الفيلم ده هيبقى ولما تشوفيه في التليفزيون هتقولي ده فيلم مهم طب منجحش ليه، والمواضيع دي بقالها معانا عمر وجاية من الموروثات والمعتقدات، ونفسيتي متعبتش بسبب الفيلم ما أنا عارفة المشاكل.
وروت يسرا تفاصيل مشهد المصحة الشهير في مسلسل أنف وثلاث عيون، قائلة: مع الوقت أنتي كممثلة بتبقي عارفة تفرقي لما تعيشي في مشهد ومش عارفة تخرجي منه، وده حصل معايا قبل كده وفي يوم كسرت الديكور في أنف وثلاث عيون، والمشهد ده كان بتاع المصحة النفسية وهو كان 12 صفحة، فأنا روحت للأستاذ نور الدمرداش قولتله الست دي مينفعش تتكلم كل ده بالتعب اللي هي فيه، لكن لو اللي قدامها بيتكلم وحس بكسرتها لدرجة إنها مش قادرة تنطق ممكن يتفاعل أكتر، والنبي ماتخلنيش أقول الكلام ده، قالي اعملي اللي أنتي عايزاه أنا هسيب الكاميرا عليكي وإذا ماعجبنيش هتقولي الكلام.
وأضافت يسرا: فاجاة لاقيت روحي بعيط بصمت وكمال الشناوي بكى من إحساس ضعفي، وخلصنا المشهد وأستاذ نور والبلاتوه كله بيصقف، وأنا مكنتش عارفة أبطل عياط وكسرت الديكور.
يسرا: عمري ما عملت إلا دور البطولة.. وعملت 100 فيلم ومعرفش عدد مسلسلاتي
وأكدت الفنانة يسرا أنها لم تقدم إلا دور البطولة منذ بداية مشوارها الفني: الأستاذ عبد الحليم نصر إداني الفرصة الأولى في حياتي والبطولة مباشرة، وعمري ما عملت إلا أدوار بطولة أو بطولة جماعية، وعمري ما نزلت عن البطولة لأنه قالي أنا بديكي بطولة فيلم يعني أنتي تبقي بطلة، لو قررتي تتنازلي مش هتطلعي تاني، وده من أكتر من 40 سنة، ومن ساعتها وأنا بطلة.
واستكملت: مقدرش أقول إيه هو دور عمري، وفي حاجات تتصوري أنها دور عمرك وهي مش كده، وفي حاجات تعمليها وتلاقيها دور تقيل، فأنا عاملة 100 فيلم ولا أعلم كام مسلسل و4 مسرحيات، وكل حاجة جديدة معملتهاش لسة بعملها.
يسرا: يوسف شاهين كان ديكتاتور.. وهو حالة خاصة زي عادل إمام وعمرو دياب
وحرصت الفنانة يسرا، على الحديث عن المخرج الراحل يوسف شاهين، قائلة: يوسف شاهين عمري ما هنسى وقفاته معايا واحتضني إزاي، هو صدقني وشاف حاجة مفيش حد شافها زيه، إسكندرية كمان وكمان خد كلام أنا قولته في الحياة وحطه في الفيلم، كان ينفذ العمل وماحدش يناقشه، كان ديكتاتوري الدكتاتورية الرائعة، وهو كان بيشوف أن الممثل مش حاجة سهلة، إنسان خاص جدًا ومش هيتكرر تاني ولا حد من تلامذته مع كل حبي واحترامي ليهم كلهم ولكن ماحدش زيه خالص، هو حالة خاصة زي عادل إمام وعمرو دياب.
