ميدالية الجنة
بطل رفع الأثقال والمحاضر الأمريكي ريك ميتزجر، زار في سنة 1995 مدرسة إعدادية عشان يلقي كلمة قدام الأطفال باعتباره نموذج ناجح وقتها.. بعد ما خلص الكلمة بتاعته وقبل ما يمشي مدير المدرسة طلب منه بشكل خاص إنه يروح يزور طفل مريض في بيته كان عايز ييجي بس ظروفه الصحية منعته.. "ريك" وافق.. وهما في الطريق عرف من المدير إن الطفل ده اسمه "ماثيو" وإنه لما اتولد وبسبب المرض اللي اتولد بيه الدكاترة قالوا لأبوه إن عمره مش هيزيد عن 5 سنين.. عدت الـ 5 سنين والولد كويس.. الدكاترة قالوا مش هيكمل لـ 10 سنين.. عدت الـ 10 سنين والولد كويس ولسه عايش بمرضه!.. "ماثيو" بقى عنده 13 سنة ولسه بيعافر مع المرض الغامض بتاعه، وبيعتبر إن "ريك" مثل أعلى له.. طبعًا بعد كل الأسباب دي كان لازم "ريك" يحس برغبة حقيقة إنه يزور الولد القوي ده اللي قدر يقاوم المرض ويتعرف عليه.. قابله.. قعدوا يتكلموا لمدة ساعة كاملة!.. الطفل "ماثيو" ماجابش سيرة المرض ولا التعب نهائي وكل كلامه كان عن تحقيق الأحلام والتفوق واشتكى شوية إن زملائه في الفصل بيتريقوا عليه بسبب طبيعة جسمه غير المتناسقة بس قال إن هو مش مهتم خالص بكلامهم.. لما "ريك" سأله عن حلمه اللي نفسه يحققه "ماثيو" رد وقال إنه بيحلم إنه يبقى بطل رفع أثقال زيه وإنه هيقدر يحقق ده في يوم من الأيام.. "ريك" فتح الشنطة بتاعته وخرج منها أول ميدالية ذهب خدها في حياته وحطها في رقبة "ماثيو" وقاله: (إنها لك فأنت من يستحقها وليس أنا لأنك مميز أكثر ممن يفوزون بالميداليات الذهبية).. "ماثيو" خلع الميدالية من رقبته ورجعها تاني لـ "ريك" ورد قال: (أنت من فاز بها وليس أنا، ويومًا ما سوف أفوز بميدالية ذهبية وسوف تراها).. عدت سنة على الزيارة دي.. "ريك" جاله جواب من والد "ماثيو" بيقوله إنه مات وإنه قبل ما يموت سابله رسالة.. دي نصها: (صديقي ريك.. أخبرني الأطباء أن نهاية أيامي في الحياة قد اقتربت.. الآن أتنفس بصعوبة ولكني لازلت مبتسما.. أعلم الآن أنني لن أستطيع أن أفوز مثلك بميدالية ذهبية كما وعدتك وأعلم أن الوقت ليس في صالحي لتحقيق ذلك، ولكني أعلم أيضًا أنني بطل والله يعلم هذا وعندما أدخل الجنة سوف يعطيني الله ميدالية ذهبية وعندما نلتقي هناك سوف أجعلك تراها.. شكرًا على زيارتك العظيمة لي.. الوداع صديقك "ماثيو").
• من الحاجات اللي مكافأة ربنا ليك عليها بترجعلك غالبًا في وقتها إنك تسعد غيرك، وتجبر بخاطرهم.. تشوف هما عايزين إيه، ناقصهم إيه، محتاجين إيه.. سعادة رايحة جاية ومش بتكلفك حاجة.. زرعة بتزرعها في غيرك فتنبت في قلبك.. حاجة كدة زي صوابع لروحك بتطبطب بيها على روح اللي قدامك مش جسمه.. عشان كده تستغرب من اللي بيبخل يكون سبب في تغيير مزاج أو حياة غيره للأفضل!.. كله بيرجع.. اسعد غيرك يسعدك ربك.. بابتسامة.. بخدمة.. بسؤال.. باهتمام.. بأي حاجة أي حاجة.. القليل عندك أكيد هيكون كتير عند غيرك.
