ضحايا منصة SGO.CC يروون تفاصيل تعرضهم للنصب: الوكلاء اختفوا والفلوس راحت علينا
شهدت الأيام الماضية شكاوى من منصة SGO.CC للتداول في العملات، والتي تعتمد بشكل كبير على مراهنات المكسب والخسارة وتوقعات نتيجة المباريات، حيث ذكر عدد من مستخدمي منصات التواصل، أنها عبارة عن وسيلة نصب وقع فيها عدد من الشباب.
وقالت أمينة أحمد، إحدى المتضررين من منصة SGO.CC، اشتركنا في منصة SGO.CC، والمفروض إن لما ندفع مبلغ 10 ألاف جنيه بيزيدوا آخر الشهر لـ 20 ألف جنيه، وكل يوم من الساعة 8 صباحا لـ 2 مساءً، بندخل نتراهن بتوقعات النتيجة العكسية لمباريات، وبعد كدا الساعة 7 مساءً الفلوس بترجع للحساب وعليها المكسب، بمعدل 300 جنيه في اليوم.
وأضافت في تصريحات خاصة لـ القاهرة 24: وفجأة بفتح البرنامج الخاص بالمنصة لقيت إنه لازم أدفع ضريبة عشان أسحب فلوسي بالأرباح، وبالفعل دفعت الضرائب عشان أعرف أفتح البرنامج والحساب ميتقفلش، ودفعت 2300 جنيه ضرائب على المبلغ الأساسي، وبعده 4 أيام المنصة طلبت تاني 700 جنيه ضرائب، بحجة إن المنصة نقلت في بلد أوربية والضرائب هتزيد، ولكن المرة دي مدفعتش.
وتابعت: لقيت الناس على السوشيال ميديا وفي الجروبات بدأت تقول إنه ده نصب و‘حنا انتصب علينا من منصة SGO.CC، والوكلاء التابعين للمنصة اختفوا، حتى المباريات اللي كنا بتتوقع نتائجها توقفت، وفلوسنا مش عارفين نرجعها، يعني بعد ما دفعنا الضريبة، وحاولنا نسحب الفلوس ظهر لنا على البرنامج الطلب قيد المراجعة، ومحدش عارف يسحب فلوسه.
ضحايا منصة SGO.CC
وقال أحمد عبدالمجيد، أحد المتضررين من المنصة: عرفت منصة SGO.CC عن طريق واحد صاحبي، هو قالي إن المنصة شغالة من 2017، وإن المبلغ اللي بندفعه بيزيد بعد شهر ونقدر نسحبه بالأرباح بعد كدا، يوم 5 فبراير، دفعت 30 ألف جنيه، كنت عامل حسابي إنه بعد شهر هسحب فلوسي سواء في أرباح أو لا، وفكرة المنصة قائمة على مكسب 1% على المبلغ كل يوم، ولو المبلغ كبير يكون المكسب أكبر، ولكن كنت مستني لما أكمل شهر في المنصة وأسحب فلوسي.
وتابع أحمد عبدالمجيد في تصريحات خاصة لـ القاهرة 24: بيعرضوا علينا جايزة ترحيب في بداية الاشتراك بالمنصة، بتكون أرباح بنسبة 6%، وده أسلوب الوكلاء التابعين للمنصة في تطميع الناس، ولو كانت المنصة استمرت كانت الناس كسبت فلوس من وراها، أنا أعرف واحد دافع 100 ألف جنيه وكسب من المنصة حوالي 300 ألف جنيه، وقفلت في حسابه حوالي 250 ألف جنيه.
وأضاف أحمد عبدالمجيد: الفلوس اللي دفعتها مكنتش فلوسي وكنت مستلف عشان أجرب حظي مع المنصة، واللي مدخلني المنصة حد يعرف ربنا وبيصلي، قالي إن الفلوس والمكسب اللي هيطلعوا مفيهاش أي حرمانية، ودخلي من الجانب الديني، وأفتى لي إنها مش قمار، وإنه في شيوخ كتير مشتركين في المنصة، ولكن الموضوع طلع نصب في نصب والوكلاء التابعين ل المنصة في مصر اختفوا.
وروى أحمد شعراوي، أحد ضحايا نصب منصة SGO.CC، تفاصيل اشتراكه في منصة SGO، حيث قال اشتركت في المنصة عن طريق واحد صاحبي، ودفعت 20 ألف، عن طريق تطبيق كاش، وفكرة المنصة قائمة على مراهنات عكسية تتم من خلال كود خاص بالبرنامج، واليوم اللي فيه خسارة الفلوس بتكون ثابتة بدون أرباح، وبعد ما دفعت الفلوس وعند ما جيت أسحبها لقيته متعلق، وكلمت حد من الوكلاء في مصر، مردش عليا، وفجأة لقيت كل الناس اللي كانوا مشتركين في المنصة بيقولوا على السوشيال ميديا إنه اتنصب علينا والوكلاء اختفوا والفلوس راحت علينا.
