فيفي عبده: كل يوم بيجيلي عروض زواج.. وليه الستات الكبيرة متتجوزش؟
أكدت الفنانة فيفي عبده، أنها تتلقى عروض زواج حتى الآن، معربة عن استيائها بسبب انتقادات الجمهور للسيدات اللاتي يتزوجن في سن كبيرة، بجانب الكشف عن رأيها في دخول حفيدتها إلى وسط الرقص الشرقي.
وقالت فيفي عبده في تصريحات تلفزيونية: كل يوم بيجيلي عرسان والكومنتات كلها طلبات زواج ولكن أنا ست متجوزة ولو أنا وحيدة اتجوز، واللي بينتقدوا الزواج في السن الكبير، هي الكبيرة متتجوزش وليه الكبيرة متتجوزش والناس المفروض متنتقدش، وفي ناس بتبقى محتاجة ونس في البيت.
أما عن رأيها في دخول حفيدتها مجال الرقص، فقالت فيفي عبده: لو حفيدتي طلبت ترقص هرفض، وأيامي كان الرقص حاجة تانية وكان فيه احترام، وكل الناس اللي قعدة تتفرج على العروض مهمين ومش أي كلام وكان ناس ثقيلة ومحترمة.
وتابعت: مش ممكن اسمح لها بده وهي اتعلمت وأنا اتبهدلت في الشغل عشان اوصل لمكانتي حاليًا، والرقص الشرقي كان زمان له جمهور وقيمة عن دلوقتي، وأنا برقص في البيت، ومصر كانت مليانة راقصات ودلوقتي وكفاية المهاجمة للرقص طوال الوقت، والكتاب يطلعوا أي واحدة عايزة تنحرف تبقى رقاصة ودي نقطة ضعف.
فيفي عبده: وفاة 2 إخواتي في سنة واحدة خنجر دخل في قلبي وأنا أضعف إنسانة في الدنيا
وعلقت الفنانة فيفي عبده، على موقفها من وفاة اثنين من أشقائها في عام واحد، قائلة: وفاة اثنين اخواتي في سنة واحدة خنجر دخل في قلبي ومكنتش عايزة أشوف حد ولا أتكلم مع حد، وكنت شغالة على مهدئات ونفسيتي كانت وحشة.
وأضافت: أنا أضعف إنسانة في الدنيا والقوة اللي بظهر فيها بأخذها من حب الجمهور وبيعطوني الطاقة أقف واقوم، لكن ده حال الدنيا، ولما بيحصل كده من فقدان أهل بهرب وبفضل نايمة ومش عايزة حد يفكرني ولا يقولي البقاء لله، ولا عايز أواجه حد والألم بيكون فظيع.
