أبرز تصريحات فيفي عبده: معترفة بالزواج العرفي وكل الرجالة بتخون.. ولا بد الراجل يكون عنده نزوات
حلت الفنانة فيفي عبده ضيفة على أحد البرامج التلفزيونية، وتحدثت خلال اللقاء عن تفاصيل حياتها الشخصية، وكشفت رأيها في تصرف المرأة بعد اكتشاف خيانة زوجها، ودخول حفيدتها لعالم الرقص الشرقي، وتعرضها للتحرش في فيلم امرأة واحدة لا تكفي.
أبرز تصريحات فيفي عبده
- الرجالة كلها بتخون، واللي يقول مش بيخون وماشي على الصراط المستقيم مش صحيح.
- لا بد الراجل يكون عنده نزوات، وبتبقي قمر وتتخان، والمفروض تعمل نفسها مش عارفة.
- الست لو واجهت الراجل بخيانته أكبر غلط لها في الحياة، والحياة دلوقتي صعبة ونسبة الطلاق عالية جدًا.
- الست حقها تفتش ورا جوزها، وحقه يخلي باله من مراته ولكن الست لازم تفهم ولو عرفت أنه بيخونها تطنش.
- الراجل لو بيحب مراته يبيع أي حاجة في الدنيا عشانها لكن هي لازم تستحمل وتعدي، وكان في ناس بتحاول تشككني في جوزي، ولكن مكنتش بعطي فرصة لكده.
- كل يوم بيجيلي عرسان والكومنتات كلها طلبات زواج، لكن أنا ست متجوزة ولو أنا وحيدة اتجوز.
- اللي بينتقدوا الزواج في السن الكبير.. هي الكبيرة متتجوزش، وليه الكبيرة متتجوزش والناس المفروض متنتقدش، وفيه ناس بتبقى محتاجة ونس في البيت.
- لو حفيدتي طلبت ترقص هرفض، وأيامي كان الرقص حاجة تانية وكان فيه احترام.
- مش ممكن اسمح لها بده وهي اتعلمت، وأنا اتبهدلت في الشغل عشان أوصل لمكانتي حاليًا، والرقص الشرقي كان زمان له جمهور وقيمة عن دلوقتي، وأنا برقص في البيت.
- وفاة 2 أخواتي في سنة واحدة خنجر دخل في قلبي، ومكنتش عايزة أشوف حد ولا أتكلم مع حد، وكنت شغالة على مهدئات ونفسيتي كانت وحشة.
- أنا أضعف إنسانة في الدنيا، والقوة اللي بظهر فيها باخذها من حب الجمهور وبيعطوني الطاقة أقف.
- لما بيحصل كده من فقدان أهل بهرب، وبفضل نايمة ومش عايزة حد يفكرني ولا يقولي البقاء لله، ولا عايزه أواجه حد والألم بيكون فظيع.
- أنا مقدرش أكون زوجة تانية، وحتى لو هو متجوز المهم أني معرفش الأولى ولا أشوفها، ولو حد اتقدملي ومقاليش أنه متجوز هحترم ده وهعمل نفسي مش عارفة.
- ميقدرش يقولي أنه متجوز أصل الرجالة اللي بتدور عليا مش أنا اللي بدور عليهم، كل اللي عايزة أعرفه أنك الراجل بتاعي حبيبي، وماليش دعوة بأي حاجة تانية.
- أنا معترفة بالجواز العرفي وأكيد مش هخلي راجل يلمسني من غير جواز، وأنا بعتبر الجواز العرفي فترة خطوبة، وبعدين أكتب الكتاب رسمي لما أعرفه.
- أنا بتجوز وأنا مش عارفاهم، والحمد لله جوازاتي كلها محترمة.
- كنت في مشهد في فيلم امرأة واحدة لا تكفي، والمفروض أن بيت أخويا وقع وبينزلوني من البيت وهما بيشولوني بالسلم لاقيت واحد شايلني بيحسس وهو نازل وإيده على ضهري، نزلت عليه ضرب بالأقلام.
