عندي خبرة بدون شهادات.. بلوجر تقدم نصائح للعناية بالشعر مقابل 1000 جنيه شهريًا: فيه دكاترة بيطلبوا خبرتي| خاص
نشرت سيدة منشورًا لها بأحد جروبات البنات عبر موقع التواصل الاجتماعية فيسبوك، تسأل البنات عن بلوجر تقدم نصائح ووصفات العناية بالشعر مقابل مبلغ مادي، وقالت السيدة: يا جماعة بالله عليكم قولوا الحق وخلي بنتي تشوف الكومنتات، بنتي شعرها اتغير شوية وبقى ناشف ومقصف، ولقيتها بتقولي أنا هتابع مع البلوجر دي وعايزة 1000 جنيه في الشهر مقابل المتابعة، هل الكلام دا ينفع مش الأفضل نروح لدكتور جلدية ولا نمشي ورا الهبل دا.
بلوجر تقدم نصائح للعناية بالشعر مقابل مبلغ مالي
ومن جانبها قالت البلوجر مارينا مجدي صاحبة الـ 27 عامًا، في تصريحات خاصة لـ القاهرة 24، فيه ناس بيختلط عليها الأمر وبيفكروا إن الـ 1000 جنيه مقابل الكشف، ولكن المبلغ بيكون مقابل الكشف وشهر كامل من المتابعة، وأنا بوصف الروتين المناسب لحالة الشعر الخاصة بكل بنت، وبكمل معاها متابعة أونلاين لمدة شهر.
وأضافت مارينا مجدي، أنا بوصف لـ البنات منتجات عناية بالشعر من الصيدلية، وأنا مبعملش منتجات، ولكن فقط برشح من المنتجات اللي موجودة في الصيدليات، وكلها ماركات معروفة ولكن بوصف المناسب لكل حالة ولكل نوع شعر، في مقابل دفع 1000 جنيه.
واستكملت مارينا مجدي، أنا مش بتاعت إعلانات ولكن برشح وبوصف فقط للبنات المنتجات اللازمة للعناية بالشعر، وكل بنت لها حالة شعر مختلفة عن التانية، وبتحتاج لمنتجات عناية مختلفة وبكميات معينة تختلف من حالة لأخرى.
مارينا مجدي: عندي خبرة بدون شهادات
وأردفت مارينا مجدي، المنتجات مرخصة ولا مش مرخصة بقى أنا بوصف العلاجات اللي في الصيدلية، وبستخدم بعض المنتجات الشهيرة، وبطبقها على نفسي الأول، وطول شعري يدل على خبرتي، والـ 1000 جنيه مقابل الكشف والمتابعة فقط، والعميلة هي اللي بتشتري المنتجات من الصيدلية على حسابها.
وأردفت مارينا مجدي، أنا جربت دكاترة كتير عشان العناية بشعري، وبتعامل مع العملاء من خلال خبرتي اللي اكتسبتها من الدكاترة اللي كنت بتابع معاهم حالة شعري، أنا واحدة من الناس عنيت مع الدكاترة، وأنا بنقل خبرتي لـ المتابعين أيضًا من خلال الفيديوهات، وبتابع مع العملاء أونلاين.
وأشارت مارينا مجدي، إلى أنها خريجة كلية تربية عام قسم على نفس، وليس لديها أي علاقة بمجال الطب، ولم تحصل على أي كورسات أو دورات تدريبية أو شهادات تتعلق بمجال العناية بالشعر والتجميل، قائلة: أنا مش محتاجة أخد كورسات أو شهادات، واللي بقدمه جزء من خبرتي.
واختتمت مارينا مجدي، أنا بقدم روتين مناسب لنوع الشعر وحالته، والمنتجات موجودة في الصيدليات والسوبر ماركت، وفي دكاترة كلمتني عشان يستفيدوا من خبرتي وقولت لهم آسفة معنديش وقت، والـ 1000 جنيه اللي باخدها من العميلة مش رقم وميجيبش سعر منتجين، والمبلغ دا أنا باخده مقابل خدمة بقدمها وهي وصف كورس لعلاج الشعر، أنا عندي ريڤيو من ناس في مصر وخارج مصر وكلهم بيمشوا على تعليماتي وعلى الروتين اللي برشحه لهم، وأنا بعتبر نفسي خبيرة شعر.
