شقيق المجني عليه في مشاجرة فيصل: أخويا قالي إلحقني أنا بموت يا إسلام
شهدت منطقة فيصل بمحافظة الجيزة، واقعة مقتل جزار بطعنة نافذة في صدره، والشروع في قتل شقيقه بواسطة أصحاب محل كشري، إثر خلافات بينهما.
وحصل القاهرة 24 على نص التحقيقات في الواقعة، والتي جاءت على النحو التالي:
ما تفصيلات ما حدث بشأن الواقعة محل التحقيق؟
ج: اللي حصل إن النهاردة 9 سبتمبر2024 على حوالي الساعة 12:00 الظهر روحت أنا وأخويا بدرعلشان نفتح محل الجزاره بتاعنا في شارع الشهيد أحمد حمدي بمنطقة الطوابق فيصل، وأنا موطي على ركبتي علشان أفتح قفل الباب الحديد للمحل وأخويا بدر جنبي سمعت من ورايا صوت محمود،ا بيقولنا والله لأدبحكم، وخبطني بحاجة على دماغي من ورا فعيني زغللت وقتها، وفضلت على الأرض لمدة دقيقة، بعدها قمت بس كنت دايخ شوية لقيت محمود وأخوه محمد ومعاهم اتنين واحد اسمه ربيع وواحد اسمه أحمد واقفين حوالين أخويا بدر، ومحمود كان واقف قدام بدر، وماسك سكينة وعمال يهوّش بيها أخويا بدر ومحمد كان ماسك سكينتين واحدة في إيده اليمين وواحدة في إيده الشمال وبيأمن المكان ومحمود عمال يهوش بدر بالسكينة، وربيع كان واقف وراهم، وماسك ماسورة حديد، وواقف وراهم كلهم أحمد وكان معاه شمروخ.
مقتل جزار بمنطقة فيصل
فأنا جريت على محمود الطحان، وزقيت بدر من قدامه، ومسكت إيد محمود اليمين وإيده الشمال كان ماسك بيها السكينة قمت لقيت محمود ضربني بالسكينة في وشي من اليمين وفي إيدي اليمين وفي جانبي اليمين، وربيع ضربني بالماسورة الحديد على رجلي الشمال، وبعدها نزلت على ركبتي والناس اتلمت وكانت بتحجز ولقيت بدر أخويا واقف جنبي وكان وشه أصفر، وبيقولي الحقني يا إسلام أنا بموت قمت وقفت على رجلي، والناس اللي حوالينا أخدتني أنا وبدر ودخلونا محل بقالة في الشارع اللي قدام المحل بتاعنا، وقفلنا الباب الحديد للبقالة ووقتها لقيت بدر مصاب بجرح كبير في جنبه الشمال، وغرقان في دمه ومبيتكلمش ووشه أصفر وبعدها الناس في الشارع أخدونا وطلعوا بينا من البقالة، والناس كانت بتحجز، وجريوا بينا على المستشفى وده كل اللي حصل.
س: ما صلتك وطبيعة علاقتك أنت وشقيقك المتوفي سالف الذكر بالمتهمين؟
ج: إحنا ملناش علاقة بيهم هما أصحاب محل كشري جنبنا اللي جنب محل الجزاره بتاعنا في شارع الشهيد، وإحنا واخدين محل الجزارة ده من حوالي سنة، وهما كانوا موجودين في الشارع ده من قبلنا، وكانوا بيحاولوا يحتكوا بينا باستمرار ويعملوا معانا مشاكل بس احنا كنا بنتجنب المشاكل معاهم، وأول مشكلة بدأت بينا كان يوم عيد الأضحى اللي فات، وأنا ساعتها كنت واقف في محل الجزارة لوحدي ومحمود جالي وقالي إنه معاه خناقة وعايز ياخد من المحل عندي سكينتين اللي بدبح بيهم وإني أروح معاه الخناقة على أساس إنه يشوفني هقف جنبه واللا لأ وعلشان إحنا مش بتوع مشاكل قولتله لأ أنا بشتغل بالسكاكين، ومليش في المشاكل، فهو قالي أنا مش هقف على السكينتين بتوعك إحنا معانا سلاح كتير ومن ساعتها وهو بيتعامل معانا معاملة وحشة، ومبيسلمش علينا وإحنا كنا متجنبينه.
س: ما هي الإصابات التي أبصرتها بشقيقك المتوفي تحديدا؟
ج: جرح في الجانب الأيسر بالصدر.
س: من تحديدًا من المتهمين تسبب في إحداث إصابة شقيقك؟
ج: معرفش مين علشان أنا كنت بتضرب من محمود وربيع وبعد ما الناس اتلمت وحجزت ما بينا وأخدوني أنا وبدر دخلونا محل بقالة في الشارع اللي قدام المحل بتاعنا وقتها شوفت إصابة بدر ولقيته غرقان في دمه والجرح كان كبير جدا، وبدر كان وشه أصفر ومكنش بيتكلم خالص وكان غرقان في دمه بسبب الجرح ده، وقبلها كان عمال يقولي إلحقني أنا بموت يا إسلام.
بعد ما الناس خرجونا من محل البقالة كان محمود واقف في أول الشارع وفي إيده السكينة وبيقولنا حاجتكم أهي في الشارع ولولا الناس اخدتنا وهربتنا كان هيكمل علينا ويقتلني زي ما قتلوا أخويا بدر، وهما كانوا مقسمين أدوارهم في التعدي علينا محمود كان بيضربي على دماغي وبعد كده كان بیهوش بدر بالسكينة ومحمد،ا كان واقف بسكينتين بيأمن المكان وربيع كان واقف وراهم بالماسورة الحديد بيأمن المكان، وأحمد كان واقف في نص الشارع ماسك الشمروخ بيضرب بيه في الجو علشان الناس متتلمش ويبعدوهم عننا.
