نفسيتي اتدمرت.. فتاة تستغيث من مركز جلدية في الإسكندرية: الدكتورة حرقت لي وشي ورقبتي
استغاثت فتاة تدعى حبيبة مختار، من منطقة أبور المياه بالإسكندرية، والبالغة من العمر 26 عاما، بعد إصابتها بحروق إثر إجرائها جلسة لتقشير الجلد والرقبة داخل مركز تنظيف بشرة شهير في منطقة سموحة يوم السبت قبل الماضي.
فتاة تستغيث من مركز جلدية بسموحة بعد حرق وجهها
وقالت حبيبة مختار في تصريحات خاصة لـ القاهرة 24: يوم السبت 27 أكتوبر رحت لمركز جلدية شهير في سموحة، عشان أعمل تقشير للبشرة، فالدكتورة المسئولة عن الجلسة قالتلي لو عملتي تقشير لبشرتك بس من غير رقبتك لونها هيكون أغمق من الوش، وعملتلي تقشير للرقبة كمان، وخلال الجلسة حسيت بوجع شديد فقالتلي ده عادي يحصلك كده، وحطتلي كريم.
وأضافت: بعد ما روحت البيت غسلت وشي، بس رقبتي كانت غامقة، أول مرة غسلت فيها وشي أغمى عليا وعدى يومين مش عارفة أتحرك طبيعي وكأني متخشبة، وحاسة إن جلدي مكوي، كل يوم مش قادرة أبص لنفسي فى المرايا ونفسيتي مدمرة، وكلمت دكتور نصحني أستخدم كريم آخر، وقالي متتعرضيش للشمس ولا للحرارة.
وأردفت حبيبة: لما كلمت الدكتورة اللي عملتلي الجلسة وحكيت لها على اللي حصلي، قالتلي والله ما أعرف إزاى حصلك كده وأنا بعمل الجلسة للناس كلها! ومفيش أي مشكلة، وعملت لأكتر من بلوجر قبل كده، وأنا آسفة وهبعتلك فلوس الجلسة، قولتلها لا أنا عايزة رقبتي ترجع زي الأول، الفلوس مش هتعوضني.
واستكملت حبيبة: بعت صوري لدكتور متخصص عندنا في اسكندرية، وقالي ده حرق من الدرجة الثانية وكتبلي على علاج آخده بس فعلا نفسيتي تعبانة ومش قادرة أواجه الناس ولا أنزل من البيت، لما كلمت الدكتورة دي وقولتلها هرفع قضية على المركز، فقالت لي بلاش وإنها مستعدة تتحمل تكاليف العلاج بس منزلش حاجة على السوشيال ميديا، وبعدها مسحت الفيديو اللي نزلته للسيشن بتاعي عندها على البيدج.
واختتمت حبيبة مختار قائلة: أنا روحت على أساس أعمل جلسة زي البلوجر اللي شوفتها على السوشيال ميديا، متوقعتش أتحرق بالشكل ده، ويحصل فيا كده وعايزة أخد حقي وخايفة الموضوع يتكرر مع ناس تانية، وهعمل محضر إن شاء الله.
