المتهم بقتل نجل صاحب مقهى أسوان: شفته قدامي وطلعت المطواة من جيبي وضربته علشان كنت قرفان من مشاكلنا |خاص
كشفت التحقيقات، عن تفاصيل جديدة في قضية قتل نجل صاحب مقهى أسوان، والذي أنكر ارتكابه واقعة القتل العمد؛ لأن المجني عليه هو من ذهب إليه داخل المحل الذي يعمل به، وحاول الاعتداء عليه.
قتل نجل صاحب مقهى أسوان
وحصل القاهرة 24 على التحقيقات في واقعة اتهام ناصر. ص، 28 سنة، بكالوريوس نظم ومعلومات إدارية، لاتهامه بإنهاء حياة شخص وسط الشارع بعدة طعنات.
وإلى نص التحقيقات
س: ما تفصيلات إقرارك؟
ج: اللي حصل إن في خلافات بيني وبين محمد، ومن حوالي 5 سنين حصلت بنا مشكلة واتخانقنا مع بعض وضربنا بعض، وبعدها الناس حاشت بنا والموضوع خلص، ومحمد كان واخد حصة في العمارة إلى محل العصير بتاعي فيها في شارع المسلة بالكوربة، ومكنتش عايز يكون ليه حصة في العمارة إلى أنا فيها، وكان فى قضايا كتير بينه وبين صاحب العمارة، ولما كنا بنشوف بعض كان بيحصل ساعات مشادات، لكن الناس كانت بتحوش والموضوع بيخلص.
وأضاف: آخر مشكلة كانت امبارح، لقيت محمد كان جاي يزعق ويشتم من عند قهوة أسوان بتاعته، ولقيته ماشي أمام محل العصير بتاعي وعمال يزعق لأن في خلافات سابقة بنا، خرجت من المحل وكان معايا مطواه في جيبي وكنت قرفان منه ومن المشكلة إلى بتحصل بنا، فطلعت المطواه من جيبي ودخلت على محمد وضربته بيها أكثر من ضربة ومش فاکر کام ضربه تقريبًا، ووقع على الأرض وفضلت أضرب فيه ووقعت فوقه على الأرض ومحستش بنفسي لقيتني عمال اغرز المطواة في بطنه، والناس قعدت تحوش وأنا مكنتش عايز أسيبه.
وتابع: فضلت أضرب فيه، والأهالي ضربوني بالكراسي علشان أقوم من عليه، لكن فضلت أضرب فيه بالمطواه وبعدها قلتله إنت الى وصلتني إني أعمل فيك كدا، وبعدها الناس قومتني من عليه، ودخلت محل العصير، وبعد كدا فيه 2 أمناء شرطة، خدوني على موتوسيكل وودوني على قسم مصر الجديدة وفتشوني هناك، كان معايا مفاتيح البيت بس.
س: متی وأين حدث ذلك؟
ج: ضربت محمد يوم 30 أكتوبر 2024 الساعة١٢:٣٠ مساء، في شارع المسلة في الكوربة بمصر الجديدة.
س: ما سبب ومناسبة تواجدك بالزمان والمكان سالفي الذكر؟
ج: كنت قاعد في محل العصير بتاعي.
س: وما هي ظروف نشأتك تحديدا؟
ج: أنا مواليد 1990، أبويا متوفى وأمي موجودة وعندي 4 أشقاء، وأعزب.
س: وما في المؤهلات العلمية التي حصلت عليها ؟
ج: معايا بكالوريوس نظم ومعلومات إدارية ومتخرج سنة 2014.
س: وما هي جهة عملك؟
ج: انا مالك محل العصير أنا وأخواتي، وليه فروع كثير في مصر وده مصدر رزقي الوحيد.
س: وما هي حالتك الاجتماعية؟
ج: أعزب.
س: وما هي علاقتك بالمجني عليه؟
ج: جاري وهو أكبر مني في السن ومليش علاقه بيه.
من وهل من ثمة خلافات بينكما؟
ج: كان في خلافات بنا.
س: ما هي طبيعة تلك الخلافات.
ج: في خلافات بيني وبين محمد كتير، ومن حوالي 5 سنين حصلت مشكلة واتخانقنا مع بعض وضربنا بعض وبعدها الناس جت حالت بنا والموضوع خلص، ومحمد كان واحد حصة في العمارة إلى محل العصير بتاعي فيه في شارع المسلة بالكوربة، ولما كنا بنشوف بعض كان بيحصل مشاجرة ساعات.
س: ومتى نشأت تلك الخلافات؟
ج من حوالي 5 سنين تقريبا.
س: وإلى أي مدى تطورت تلك الخلافات؟
ج: كان بيحصل بنا مشاكل واتخانقنا مع بعض وضربنا بعض.
س: هل اشترك معك أحد في ارتكاب الجريمة؟
ج: لا، أنا طلعت المطواه وضربته، محدش ضربه غيري.
