شاهد على مقتل نجل صاحب مقهى أسوان: ضربه بالسكينة في بطنه ومكنش عايز يخرجها| تحقيقات
يواصل القاهرة 24 نشر التحقيقات في جريمة مشاجرة الكوربة، والتي على إثرها أنهى شخص حياة نجل صاحب مقهى أسوان بمصر الجديدة؛ بسبب وجود خلافات بينهما على حصة عقارية تطورت بإقدام المتهم على التوجه نحو المجني عليه، وطعنه عدة طعنات نافذة بالجسد أودت بحياته.
شاهد على جريمة مقتل نجل صاحب مقهى أسوان بالكوربة
واستمعت جهات التحقيقات في القضية لأقوال الشاهد الأول ويدعى أيمن. ب. ح 44 سنة، وبسؤاله ما صلته بالمتوفى محمد. ع. م؟ أجاب: هو يبقى ابن خالي.
وإلى نص التحقيقات
س: ما معلوماتك بشأن الواقعة محل التحقيقات؟
ج: اللي حصل إن يوم الواقعة كنت واقف شغال في قهوة أسوان في الكوربة في مصر الجديدة، لقيت محمد. ع، المجني عليه، ابن خالي جه قعد في القهوة، وبعدها بشويه لقيت أمیر.ك جه قعد يشتم في محمد ومسكو في بعض، وأنا والناس وقفنا حوشنا بينهم وحلينا المشكلة، وأمير مشي دخل محل العصير بتاع ناصر. ص. م، المتهم، وبعدها بشويه محمد راح البيت روحت وراه، عشان خوفت يحصل مشكله تاني.
وأكمل: وانا ماشي ورا محمد، لقيت ناصر طالع من محل العصير ومعاه مطوة في إيده وضرب محمد بيها في بطنه، وفضلوا ماسكين في بعض لحد ما قربت منهم والناس أتلمت وقعدنا نحوش ما بينهم، لحد ما ناصر شال السكينة من بطن محمد بالعافية، ومكنش عايز يشيلها من بطنه، ومحمد وقع على الأرض والناس كانت ملمومة بتحوش.
وأردف خلال أقواله أمام جهات التحقيقات: وناصر جه من ورا الناس على محمد تاني حط المطواة على رقبته، ومشاها على رقبته، وقعد يزعق ويقول: أنا من أسيوط أنا مبسبش حقي، أنا خدت حقي خلاص!! والناس مسكت ناصر ودخلوه المحل لحد ما الشرطة جات وخادوه، وإخوات محمد خدوه في عربيه وراحوا بيه على مستشفى هليوبوليس، ولما وصلوا المستشفى كلموني يبلغوني إن محمد مات، روحت وراهم على المستشفى، وجيت النيابة النهاردة.
س: متى وأين حدث ذلك؟
ج: الكلام ده حصل 30 أكتوبر الماضي، حوالي الساعة 12 مساءً، في شارع الكوربة بمصر الجديدة.
س: ما سبب ومناسبة وجودك بالزمان والمكان سالفي الذكر؟
ج: أنا كنت بشتغل مع ابن خالي المتوفى محمد في قهوة أسوان في الكوربة.
س: مَن كان برفقتك آنذاك؟
ج: كان معايا ابن خالي محمد. ع المتوفى.
س: وكم عدد الضربات التي كالها المشكو في حقه ناصر للمجنى عليه محمد، تحديدًا؟
ج: هو ضربه ودخل المطواة في بطن محمد، وقعد يغرزها في بطنه مدة طويلة، وبعدها شال المطوة ومشاها على رقبته، بس مش عارف حصل جرح ولا لأ؟
س: ما هي وجهة المتهم بالنسبة للمجني عليه بُعدا ومستوى واتجاها ؟
ج: هو كان قدامه على طول، وضربه بالسكينة في بطنه ومحمد وقع على الأرض، وقعد يغز السكينة في بطنه.
