الاعترافات الكاملة لقاتل نجل مالك مقهى أسوان في مصر الجديدة
قررت محكمة جنايات القاهرة، المنعقدة بمجمع محاكم شمال القاهرة بالعباسية، في وقت سابق تأجيل محاكمة المتهم بقتل نجل صاحب مقهى أسوان بمنطقة مصر الجديدة بالقاهرة، بسلاح أبيض مطواة بسبب خلافات إيجارية نشبت بينهما لجلسة 1 ديسمبر المقبل.
قاتل نجل مالك مقهى أسوان بمصر الجديدة
وكشفت التحقيقات، تفاصيل جديدة في قضية قتل نجل صاحب مقهي أسوان، والذي أنكر ارتكابه واقعة القتل العمد؛ لأن المجني عليه هو من ذهب إليه داخل المحل الذي يعمل به، وحاول الاعتداء عليه.
قتل نجل صاحب مقهى أسوان
وحصل القاهرة 24 على التحقيقات في واقعة اتهام ناصر. ص، بكالوريوس نظم ومعلومات إدارية، لاتهامه بإنهاء حياة شخص وسط الشارع بعدة طعنات، وإلى نص التحقيقات:
س: ما تفصيلات إقرارك؟
ج: اللي حصل إن فيه خلافات بيني وبين محمد، ومن حوالي 5 سنين حصلت بينا مشكلة واتخانقنا مع بعض وضربنا بعض، وبعدها الناس تدخلت بينا والموضوع خلص، ومحمد كان واخد حصة في العمارة اللي محل العصير بتاعي فيها في شارع المسلة بالكوربة، ومكنتش عايز يكون ليه حصة في العمارة اللي أنا فيها، وكان فيه قضايا كتير بينه وبين صاحب العمارة، ولما كنا بنشوف بعض كان بيحصل ساعات مشادات، لكن الناس كانت بتدخل والموضوع بيخلص.
وأضاف: آخر مشكلة كانت قبل الواقعة بيوم، لقيت محمد كان جاي يزعق ويشتم من عند قهوة أسوان بتاعته، ولقيته ماشي أمام محل العصير بتاعي وعمال يزعق لأن فيه خلافات سابقة بينا، خرجت من المحل وكان معايا مطواه في جيبي وكنت قرفان منه ومن المشاكل إلى بتحصل بينا، فطلعت المطواة من جيبي ودخلت على محمد وضربته بيها أكثر من ضربة ومش فاکر کام ضربة تقريبًا، ووقع على الأرض وفضلت أضرب فيه ووقعت فوقه على الأرض ومحستش بنفسي لقيتني عمال أغرز المطواة في بطنه، والناس حاولت تحوشني عنه وأنا مكنتش عايز أسيبه.
وأكمل المتهم: فضلت أضرب فيه، والأهالي ضربوني بالكراسي علشان أقوم من عليه، لكن فضلت أضرب فيه بالمطواة وبعدها قلت له إنت اللي وصلتني إني أعمل فيك كده، وبعدها الناس قومتني من عليه، ودخلت محل العصير، وبعد كده فيه 2 أمناء شرطة، خدوني على موتوسيكل وودوني على قسم مصر الجديدة وفتشوني هناك، كان معايا مفاتيح البيت بس.
س: متی وأين حدث ذلك؟
ج: ضربت محمد يوم 30 أكتوبر 2024 الساعة 12:30 مساء، في شارع المسلة في الكوربة بمصر الجديدة.
س: ما سبب ومناسبة وجودك بالزمان والمكان سالفي الذكر؟
ج: كنت قاعد في محل العصير بتاعي.
س: وما هي ظروف نشأتك تحديدا؟
ج: أنا مواليد 1990، أبويا متوفي وأمي موجودة وعندي 4 أشقاء، وأعزب.
س: وما هي المؤهلات العلمية التي حصلت عليها؟
ج: معايا بكالوريوس نظم ومعلومات إدارية ومتخرج سنة 2014.
س: وما هي جهة عملك؟
ج: أنا مالك محل العصير أنا وأخواتي، وليه فروع كتير في مصر وده مصدر رزقي الوحيد.
س: وما هي حالتك الاجتماعية؟
ج: أعزب.
س: وما هي علاقتك بالمجني عليه؟
ج: جاري وهو أكبر مني في السن ومليش علاقه بيه.
س: وهل من ثمة خلافات بينكما؟
ج: كان فيه خلافات بينا.
س: ما هي طبيعة تلك الخلافات.
ج: فيه خلافات بيني وبين محمد كتير، ومن حوالي 5 سنين حصلت مشكلة واتخانقنا مع بعض وضربنا بعض وبعدها الناس تدخلت بينا والموضوع خلص، ومحمد كان واخد حصة في العمارة اللي محل العصير بتاعي فيها في شارع المسلة بالكوربة، ولما كنا بنشوف بعض كان بيحصل مشاجرة بينا ساعات.
س: ومتى نشأت تلك الخلافات؟
ج من حوالي 5 سنين تقريبا.
س: وإلى أي مدى تطورت تلك الخلافات؟
ج: كان بيحصل بينا مشاكل واتخانقنا مع بعض وضربنا بعض.
س: هل اشترك معك أحد في ارتكاب الجريمة؟
ج: لا، أنا طلعت المطواة وضربته، محدش ضربه غيري.
