صاحبة عقار آيل للسقوط بالمرج: كنت بحضر السحور وابني قالي البيت انقسم نصين

استغاث أهالي شارع المركز الاجتماعي بمنطقة المرج التابعة لمحافظة القاهرة، بالأجهزة المسئولة من أن أحد المنازل تعرض لتصدعات كبيرة تهدد بسقوطه وتمثل خطرًا على الأهالي، مناشدين بسرعة التدخل لإنقاذهم من كارثة محتملة قد تودي بحياة العديد من الأسر في المنطقة.

صاحبة العقار الآيل للسقوط بمنطقة المرج

وانتقل القاهرة 24 إلى مكان العقار وأجرى لقاء مع الأهالي المتضررين وصاحبة العقار، التي قالت: اللي حصل إن يوم الأحد بالليل حوالي الساعة 12 كنت قاعدة في البيت بحضر سحور عشان نصوم تاني يوم ونزل ابني يجيب سحور وبعدين لقيته بيرن عليا بيقولي يا ماما انزلي بسرعة البيت اتقسم نصين من تحت.

وأضافت صاحبة العقار الآيل للسقوط، بعدها نزلت بسرعة أشوف ايه اللي حصل لقيت ماسورة مياه كانت معمولة تحت البيت من 15 سنة بتجيب مياه عامله زي ماكنية الري وبعدين لقيت البيت ميل، فقمت طلعت بسرعة أخليت السكن من الصغار وأسرتي.

وواصلت: بعدها جات الأجهزة المسئولة وسألوا ايه اللي حصل وايه الماسورة دي فقولت لهم إن الماسورة دي من 15 سنة تقريبًا وجه مقاول يوصل وصلات مياه مؤقتة للبيوت، ولما عمل الماسورة الأصلية لم يلغي الماسورة المؤقتة، ودا السبب الناتج عنه ميلان البيت لأن الماسورة انكسرت فنتج عنها تسرب مياه أدى إلى حدوث الميل من الناحية اللي موجود فيها ماسورة المياه وأدى إلى هبوط البيت.

وطالبت صاحبة العقار بسرعة تدخل المسئولين وإيجاد حل لإنقاذهم من كارثة محتملة، قد تودي بحياة العديد من الأسر في المنطقة.