أسرة موظف الأوبرا بعد إنهاء حياته: مستحيل ينتحر.. وفيه شبهة جنائية
قالت أسرة هاني.ع موظف دار الأوبرا المصرية الذي أقدم على إنهاء حياته، إنك تشك في وجود شبهة جنائية في وفاته، مؤكدين أنهم لا يعلمون ما إذا كان أقدم على إنهاء حياته، أم أن هناك شبهة جنائية.
تصريحات أسرة موظف الأوبرا
وقالت أسرة موظف دار الأوبرا، في لقائها مع القاهرة 24: معندناش تفاصيل بشأن إقدامه على إنهاء حياته من عدمه، وكل اللي حصل إن فيه حد من زملائه جاب تليفونه ومحفظته ونده عليه وبنته كانت بتلعب في مدخل البيت وقالها بابا ساب دول وراح مشوار وهيرجع، الكلام ده كان يوم الخميس، ومن يوم السبت بدأنا ندور عليه في المستشفيات وكل واحد بيدور في اتجاه، وكلمنا أصدقائه ومتوصلناش لحاجة لغاية يوم الأربعاء الصبح.
وأضاف شقيقه: يوم الأربعاء حد كلم والدتي وسمعتها بتصوت وكلمتهم وقلت ما يثبت إنه أخويا، ورحت النيابة وعملوا معايا تحقيق وسألوني هل فيه خلافات أو مشاكل؟، وأنا مكنتش أعرف أي حاجة عن شغله وكان نادرًا لما يحكي حاجة عن شغله.
وأضاف: منعرفش أي حاجة عن موضوع مشاكله مع زملائه في الشغل، واللي يجبر إنسان إنه يعمل كده ويتخلص من حياته لازم يكون ضغط قهري مش عادي، وهو مستحيل يعمل كده من نفسه عشان مشكلة، وفيه شبهة جنائية.
أما عن الرسالة التي نُسبت للموظف المنتحر، فعلق شقيقه: ده مش خط أخويا، أنا عارف خط أخويا، مين اللي كتب الرسالة دي؟، ومكنش عنده مشاكل نفسية نهائيًا وهو اللي كان شايل الأسرة وبيدير شؤونها، وكان ملتزم دينيًا.
