بسمة بوسيل: الحب عماني.. ومبقتش مبسوطة في زواجي بسبب المشاكل
تحدثت الفنانة بسمة بوسيل، عن فترة زواجها من الفنان تامر حسني، موضحة أنها كانت في سن صغير وكان مفهومها خاطئًا عن الحب، مؤكدة أنها تنصح بناتها بعدم التسرع في اتخاذ القرارات.
وقالت بسمة بوسيل في تصريحات تلفزيونية: مبقتش عارفة أنا عايزة إيه لما حبيت، كنت صغيرة أوي والحب أبهرني وعماني، وخلاني أتخلى عن شخصيتي وكل حاجة فيا حلوة، وإحنا للأسف في مجتمع الجواز فيه مقدس والأهل دايمًا عايزين أن الست تتجوز وتخلف، وغلط أن تحب شخص أكتر من نفسك وتلغي الحاجة اللي أنت عايزها ومتبقاش شايف أنت عايز إيه.
وتابعت بسمة بوسيل: كنت فاهمة كل حاجة عن الحب غلط، وكنت فاهمة أن الست تسمع كلام جوزها في كل حاجة بما فيها أنه يلغي شخصيتها، اللي بيحب حد مبيلغيش شخصيته وبيزوده مش ينقصه، واللي بيعمل كده بيبقى ضعيف لدرجة أنه مي شايف اللي عنده.
وواصلت: في بداية زواجي كنت مبسوطة وبعد كده بدأت مبقاش مبسوطة لأني بدأت ألاقي نفسي طول الوقت لوحدي والمشاكل اللي بتحصل وقلت إزاي واحدة تعمل كده في نفسها، الحب ده بيكون أخطر حب الست تدخل فيه وبتلوم أهلها علشان مقالوش ليها لأ.
بسمة بوسيل: أنا ضد الزواج المبكر
وأضافت بسمة بوسيل: أنا ضد الزواج المبكر، أنا اتجوزت وأنا عندي 20 سنة وخلفت وأنا عندي 21 وده غلط، وقبل سن الـ 21 البنت بتبقى مشاعرها متلغبطة وكل حاجة غلط، وبنصح بناتي ميتسرعوش في اتخاذ القرارات.
